20 აგვისტოს მართლმადიდებელი ეკლესია ღირსმოწამე დომენტი სპარსელს მოიხსენიებს
წარმართობიდან ქრისტიანულ სარწმუნოებამდე — წმიდანის ღვაწლი და მოწამებრივი აღსასრული.
20 აგვისტოს მართლმადიდებელი სამოციქულო ეკლესია ღირსმოწამე დომენტი სპარსელის ხსენების დღეს აღნიშნავს.
წმიდა დომენტი სპარსი იყო და ახალგაზრდობის წლებში წინაპართა ცრუსარწმუნოებას ერთგულებდა. თუმცა, ქრისტიანმა უარმა სახარების სწავლების ნათლით გაუნათა გონება და ნეტარმაც ჭეშმარიტი სარწმუნოება შეიცნო.
ამის შემდეგ დომენტიმ სამშობლოში დარჩენა აღარ ისურვა და მესოპოტამიის სასაზღვრო ქალაქ ნიზიბიას მიაშურა, სადაც ნათელიღო და ერთ-ერთ მონასტერში ბერად აღიკვეცა. მისი მადლმოსილი ცხოვრება და სულიერი ღვაწლი სავანის ზოგიერთ მკვიდრში შურის მიზეზი გახდა, რის გამოც წმიდანმა მონასტერი დატოვა და თეოდოსიპოლში, წმიდა სერგისა და ბაქოსის სახელობის მონასტერს მიაშურა.
აქ იგი მკაცრი ასკეტის, არქიმანდრიტ ნურველის ხელმძღვანელობით მოღვაწეობდა. დომენტის ღვაწლით მოხიბლულმა ნურველმა იგი დიაკვნად აკურთხა და მოგვიანებით მღვდლად კურთხევაც მოისურვა, თუმცა თავმდაბალმა წმიდანმა თავი ამ ღირსებისათვის უღირსად მიიჩნია.
წმიდა დომენტი სირიაში, ერთ უდაბურ მთაზე განმარტოვდა. თავდაპირველად ღია ცის ქვეშ ცხოვრობდა, მოგვიანებით კი გამოქვაბულში დამკვიდრდა ორ მოწაფესთან ერთად. თავისი წმიდა ცხოვრებითა და ქადაგებით მან მრავალი წარმართი მოაქცია ქრისტეს სჯულზე.
იმ პერიოდში, როდესაც სპარსელებთან საბრძოლველად მიმავალი იმპერატორი იულიანე განდგომილი (361-363) იმ მხარეში იმყოფებოდა, სადაც წმიდა დომენტი და მისი მოწაფეები მოღვაწეობდნენ, მისი ბრძანებით უფლის სათნომყოფელნი შეიპყრეს. ერთი გადმოცემით, ისინი ქვებით ჩაქოლეს, სხვა ცნობით კი მღვიმის შესასვლელი ამოქოლეს და წმიდანები შიგ ცოცხლად დამარხეს.
წმიდა დომენტიმ მოწამებრივი აღსასრული 363 წელს მიიღო და ქრისტესადმი ერთგულებითა და შეურყეველი სარწმუნოებით მარადიულ ხსოვნად დარჩა ეკლესიის ისტორიაში.
მართლმადიდებელ ჟურნალისტთა კავშირი წერდა, პატრიარქი ფერისცვალების დღესასწაულზე სამთავროს მონასტერში აღავლენს წირვას.
