მიტროპოლიტი სტეფანე ცაგერში ადგილობრივ მოსახლეობას შეხვდა

ჭყონდიდის, ცაგერისა და ლენტეხის მიტროპოლიტი სტეფანე. ფოტო: ცაგერის მუნიციპალიტეტი

27 ოქტომბერს ჭყონდიდის, ცაგერისა და ლენტეხის მიტროპოლიტმა სტეფანემ ცაგერის ღვთისმშობლის მიძინების ტაძარში სადღესასწაულო საღმრთო ლიტურგია აღავლინა.

ღვთისმსახურების შემდეგ ცაგერის კულტურის ცენტრში ადგილობრივ მოსახლეობასთან შეხვედრა გაიმართა, სადაც მიტროპოლიტმა სტეფანემ ქრისტიანული სარწმუნოების საფუძვლებზე ისაუბრა.

ღონისძიებას ცაგერის მუნიციპალიტეტის მერი ჭაბუკი ჭაბუკიანი, მერის პირველი მოადგილე რევაზ ახვლედიანი და საკრებულოს თავმჯდომარე ვასილ საღინაძე დაესწრნენ.

შეხვედრის დასასრულს ჭაბუკი ჭაბუკიანმა მიტროპოლიტ სტეფანეს საჩუქრები გადასცა და საზოგადოებისთვის გაწეული სულიერი თანადგომისა და მსახურებისთვის მადლობა გადაუხადა.

„მეუფეო, განუზომელია თქვენი ღვაწლი ჩვენი კუთხის, ქვეყნისა და ეკლესიის წინაშე. თქვენი სულიერი მსახურება, რწმენის განმტკიცებისა და საზოგადოების სულიერი განვითარებისკენ მიმართული საქმიანობა განსაკუთრებულ პატივისცემას იმსახურებს. მადლობა იმ სიკეთისა და სულიერი თანადგომისთვის, რომელსაც ჩვენს საზოგადოებას უწევთ. გისურვებთ ჯანმრთელობას, მხნეობასა და მრავალწლიან ნაყოფიერ მოღვაწეობას“, — აღნიშნა ცაგერის მუნიციპალიტეტის მერმა.

ღონისძიებას ასევე ესწრებოდნენ ლენტეხის მუნიციპალიტეტის მერი გიორგი გაზდელიანი, ცაგერის მუნიციპალიტეტის მერის მოადგილე მამუკა ლეთოდიანი, საკრებულოს თავმჯდომარის პირველი მოადგილე რეზო ხეცურიანი და ჭყონდიდისა და ლენტეხის ეპარქიებიდან მოწვეული სასულიერო პირები.

მართლმადიდებელ ჟურნალისტთა კავშირი ადრე წერდა, ჭყონდიდელმა მიტროპოლიტმა წმინდა გიორგის მონასტერში საღვთო ლიტურგია აღავლინა.

წაიკითხეთ ასევე