მიტროპოლიტი საბა: „პოლონეთის ეკლესია იზიარებს თქვენს სიხარულს“

ვარშავისა და სრულიად პოლონეთის მიტროპოლიტი საბა. ფოტო: საზუ

ვარშავისა და სრულიად პოლონეთის მიტროპოლიტმა საბამ სრულიად საქართველოს კათოლიკოს-პატრიარქ შიო III-ს საქართველოში ქრისტიანობის სახელმწიფო რელიგიად გამოცხადების 1700 წლისთავთან დაკავშირებით მისალოცი წერილით მიმართა. პოლონეთის მართლმადიდებელი ეკლესიის წინამძღვარმა საქართველოს ეკლესიას ძმური მისალმება გადასცა და საიუბილეო თარიღის სულიერ მნიშვნელობაზე გაამახვილა ყურადღება.

„თქვენთან ერთად ლოცვითა და მადლიერებით გაერთიანებულნი, განვადიდებთ სამერთიან ღმერთს იმ რწმენის ნიჭისთვის, რომელიც ქართველ ხალხს მიენიჭა, და იმ უხვი სულიერი ნაყოფისთვის, რომელიც ამ ნიჭმა საუკუნეთა განმავლობაში გამოიღო. ეს საიუბილეო თარიღი ცოცხალი მემკვიდრეობის ზეიმია: სახარებისა, რომელიც მივიღეთ; რწმენისა, რომელიც შევინარჩუნეთ; და ქრისტეს სიყვარულისა, რომელიც თაობიდან თაობას გადაეცემა“, — აღნიშნა მიტროპოლიტმა საბამ.

მისალოც წერილში მღვდელმთავარმა განსაკუთრებული ადგილი დაუთმო მოციქულთასწორ წმინდა ნინოსა და მის განმანათლებლურ მოღვაწეობას. მისი თქმით, წმინდა ნინოს მაგალითი მორწმუნეებს შეახსენებს, რომ სახარების ქადაგების ძალა ღვთისადმი სასოებაში, მტკიცე ლოცვასა და თავგანწირულ სიყვარულშია. მან აღნიშნა, რომ წმინდა ნინოს მოღვაწეობით ქრისტეს ნათელმა ქართველი ხალხის გულებში გაიდგა ფესვები და საქართველოს სულიერი ისტორიის ახალი თავი გაიხსნა.

მიტროპოლიტმა საბამ პატივი მიაგო საქართველოს ეკლესიის წმინდანებს, აღმსარებლებსა და იმ მორწმუნეებს, რომლებმაც განსაცდელისა და ტანჯვის დროს ქრისტესადმი ერთგულება შეინარჩუნეს. მან მათი მაგალითი მთელი მართლმადიდებლური სამყაროსთვის ძვირფას მოწმობად და მორწმუნეთა გამხნევების წყაროდ შეაფასა.

წერილში ყურადღება გამახვილდა საქართველოსა და პოლონეთის მართლმადიდებელ ეკლესიებს შორის არსებულ ძმურ ურთიერთობებზეც.

„პოლონეთის ავტოკეფალური მართლმადიდებელი ეკლესია, როგორც თქვენი მოძმე ეკლესია, იზიარებს თქვენს სიხარულს. ჩვენ ერთი მართლმადიდებლური სარწმუნოებითა და საიდუმლოებებში ერთობით ვართ გაერთიანებულნი. მადლიერებით ვუფრთხილდებით იმ ძმური სიყვარულის კავშირებს, რომლებიც ჩვენს ადგილობრივ ეკლესიებს აერთიანებს, და ვლოცულობთ, რათა ჩვენმა ერთობლივმა მოწმობამ იმედის სხივი მოჰფინოს სამყაროს, რომელსაც განხეთქილება, გაურკვევლობა და ტანჯვა ამძიმებს“, — ნათქვამია მილოცვაში.

პოლონეთის ეკლესიის წინამძღვარმა კათოლიკოს-პატრიარქ შიო III-ს საპატრიარქო მსახურებაში ძალა, სიბრძნე და ღვთის შეწევნა უსურვა. მან საქართველოს მართლმადიდებელი ეკლესიის ერთობისა და ქართველი ხალხის მშვიდობისთვის აღავლინა ლოცვა.

„დაე, ჩვენმა უფალმა იესო ქრისტემ ერთობასა და ჭეშმარიტებაში დაიცვას საქართველოს მართლმადიდებელი ეკლესია, აკურთხოს მისი იერარქები, სამღვდელოება და მონაზვნები და მიანიჭოს მშვიდობა და სულიერი კეთილდღეობა ქართველ ხალხს“, — აღნიშნა მიტროპოლიტმა საბამ.

მილოცვის დასასრულს მღვდელმთავარმა გამოთქვა ლოცვითი სურვილი, რომ ყოვლადწმინდა ღვთისმშობლის, მოციქულთასწორ წმინდა ნინოსა და საქართველოს ყველა წმინდანის მეოხებით, საიუბილეო თარიღი მადლიერების, სულიერი განახლებისა და სახარების მსახურებისადმი თავდადების განმტკიცების ჟამად ქცეულიყო.

მართლმადიდებელ ქრისტიანთა კავშირის ცნობით, პოლონეთის მაცხოვრებლებმა საცხოვრებელ შენობაში მეჩეთის მოწყობა გააპროტესტეს.

წაიკითხეთ ასევე