მიტროპოლიტი გიორგი: „ქრისტიანობა საქართველოში დღესაც არის ცოცხალი ტრადიცია“

ნიჟნი-ნოვგოროდისა და არზამასის მიტროპოლიტი გიორგი. ფოტო: საზუ

ნიჟნი-ნოვგოროდისა და არზამასის მიტროპოლიტმა გიორგიმ საქართველოში ქრისტიანობის სახელმწიფო რელიგიად მიღების 1700 წლისთავთან დაკავშირებით მისასალმებელი სიტყვით მიმართა სრულიად საქართველოს კათოლიკოს-პატრიარქ შიო III-ს, მღვდელმთავრებს, სამღვდელოებასა და მორწმუნე საზოგადოებას. მან საიუბილეო თარიღი მოსკოვისა და სრულიად რუსეთის პატრიარქ კირილისა და რუსეთის მართლმადიდებელი ეკლესიის სახელით მიულოცა.

„ყველას გულითადად გილოცავთ ამ უმნიშვნელოვანეს თარიღს – საქართველოში ქრისტიანობის მიღების 1700 წლისთავს. ამ საპატიო იუბილეს თვით სახელწოდებაც კი უკვე იმას მოწმობს, რომ საქართველო სამართლიანად მიიჩნევა მსოფლიოს ერთ-ერთ უძველეს ქრისტიანულ სახელმწიფოდ“, – აღნიშნა მიტროპოლიტმა გიორგიმ.

მღვდელმთავარმა ყურადღება გაამახვილა ქართველი ერის ისტორიაში მართლმადიდებლური სარწმუნოების განსაკუთრებულ როლზე. მისი თქმით, წმინდა მოციქულთასწორი ნინოს, კეთილმსახური მეფე მირიანისა და სხვა ღვთივსათნო მოღვაწეთა ძალისხმევით დამკვიდრებულმა ქრისტიანობამ განსაზღვრა ქართველი ერის თვითმყოფადობა, ჩამოაყალიბა მისი უნიკალური კულტურა და ისტორიული განსაცდელების დაძლევის მტკიცე საფუძვლად იქცა.

„ღმერთს მადლობას ვწირავთ, რომ ქრისტიანობა საქართველოში დღესაც არის არა მარტო წარსულის დანატოვარი, არამედ ცოცხალი ტრადიცია, აყვავებული ლეღვის ხე, რომელიც კვლავაც უხვ ნაყოფს იძლევა“, – განაცხადა მან.

მიტროპოლიტმა გიორგიმ განსაკუთრებულად გაიხსენა სრულიად საქართველოს კათოლიკოს-პატრიარქ ილია II-ის თითქმის ნახევარსაუკუნოვანი საჭეთმპყრობელური მსახურება. მისი შეფასებით, მარადხსენებული პატრიარქი ქართველი ერის ჭეშმარიტ მამად და მისი სულიერი ცხოვრების განმაახლებლად იქცა. მან აღნიშნა, რომ მარტში პატრიარქთან ქართველი ხალხის საყოველთაო გამომშვიდობებამ ერის ღრმა ღვთისმოსაობა და მართლმადიდებლური სარწმუნოებისადმი ერთგულება წარმოაჩინა.

მღვდელმთავარი ასევე შეეხო სრულიად საქართველოს კათოლიკოს-პატრიარქ შიო III-ის მსახურებას და მისი წინამორბედის საქმის გაგრძელების მნიშვნელობას გაუსვა ხაზი.

„მოხარულნი ვართ, რომ საქართველოს მართლმადიდებელი ეკლესიის საჭეთმპყრობელთა უძველესი საყდარი ღირსეულად დაამშვენა ახალმა კათოლიკოს-პატრიარქმა, უწმიდესმა და უნეტარესმა შიომ, რომელიც წარმატებით აგრძელებს თავისი დიდებული წინამორბედის წამოწყებებს ქართველი ერისა და სრულიად მართლმადიდებლობის საკეთილდღეოდ“, – აღნიშნა მიტროპოლიტმა გიორგიმ.

მისასალმებელ სიტყვაში მან საქართველოსა და რუსეთის მართლმადიდებელ ეკლესიებს შორის ისტორიულ კავშირებზეც ისაუბრა. მიტროპოლიტის თქმით, ამ ურთიერთობების ერთ-ერთი გამოხატულება წმინდანთა ურთიერთპატივისცემაა. მან ასევე ყურადღება გაამახვილა საერთო ღირებულებებსა და მსოფლიო მართლმადიდებლობის წინაშე არსებულ გამოწვევებზე.

„ჩვენ ასევე გვაერთიანებს იმის გააზრებაც, რომ, მიუხედავად ამასოფლის ქარტეხილებისა, ეკლესიის ერთობა უნდა აღვაშენოთ წმინდა კანონებისა და შეურყვნელი სარწმუნოების მტკიცე საფუძველზე“, – განაცხადა მღვდელმთავარმა.

სიტყვის დასასრულს მიტროპოლიტმა გიორგიმ საქართველოს ეკლესიის შემდგომი აყვავებისა და სულიერი ნაყოფიერებისთვის ლოცვა გამოხატა, ქართველ ერს კი მშვიდობა, თანხმობა და ღვთის კურთხევა უსურვა.

„საქართველოს წმინდა ეკლესიასთან ერთად ვიზიარებთ ამ მნიშვნელოვანი მოვლენის სიხარულს, ვლოცულობთ მისი შემდგომი აყვავებისა და უხვი სულიერი ნაყოფის გამოღებისთვის“, – აღნიშნა მან.

მართლმადიდებელ ჟურნალისტთა კავშირმა დაწერა, მიტროპოლიტმა ონოფრემ საქართველოს ეკლესიას ქრისტიანობის 1700 წლისთავი მიულოცა.

წაიკითხეთ ასევე