თენგიზ შარმანაშვილი: ევროპული ცივილიზაცია ქრისტიანულ საფუძვლებს ეფუძნება

საქართველოს პარლამენტის წევრი თენგიზ შარმანაშვილი. ფოტო: მჟკ

საპარლამენტთაშორისო ასამბლეის ეგიდით გამართულ საერთაშორისო კონფერენციაზე განხილულ საკითხებზე საუბრისას საქართველოს პარლამენტის წევრმა თენგიზ შარმანაშვილმა ყურადღება გაამახვილა ეკლესიისა და პოლიტიკის ურთიერთობაზე, ოჯახის ინსტიტუტის წინაშე არსებულ გამოწვევებსა და ევროპული ცივილიზაციის ქრისტიანულ საფუძვლებზე.

როგორც თენგიზ შარმანაშვილმა აღნიშნა, კონფერენციის დღის წესრიგი მრავალ საკითხს მოიცავს, მათ შორის მნიშვნელოვან მიმართულებად რჩება პოლიტიკისა და ეკლესიის ურთიერთობა, ასევე ოჯახის საკითხები, რომელიც, მისი თქმით, თანამედროვე ევროპის ერთ-ერთი მნიშვნელოვანი გამოწვევაა.

თენგიზ შარმანაშვილმა ყურადღება გაამახვილა საპარლამენტთაშორისო ასამბლეის პრეზიდენტის მისასალმებელ სიტყვაზეც, სადაც, მისი თქმით, საუბარი იყო იმ გარემოებაზე, რომ თანამედროვე ოფიციალურ დოკუმენტებში ხშირად თავს არიდებენ სიტყვების — „ეკლესია“ და „ქრისტიანობა“ — გამოყენებას.

„ეს ძალიან გულდასაწყვეტია, რადგან მთელი ევროპული ცივილიზაცია ქრისტიანობას ეფუძნება“, — აღნიშნა თენგიზ შარმანაშვილმა.

მისი შეფასებით, ქრისტიანული საფუძვლების შესუსტება მხოლოდ რელიგიური საკითხის კონტექსტში არ უნდა განიხილებოდეს, რადგან ქრისტიანული მემკვიდრეობა ევროპის ისტორიული, კულტურული და მორალური განვითარების მნიშვნელოვანი ნაწილია.

თენგიზ შარმანაშვილმა ასევე აღნიშნა, რომ ევროპული საზოგადოების ერთიანობისთვის მნიშვნელოვანი შეიძლება იყოს საერთო მორალური და ღირებულებითი საფუძვლების შენარჩუნება.

„თუ ეს მოიშლება, აღარანაირი მორალური ფაქტორი აღარ იქნება გამაერთიანებელი“, — განაცხადა მან.

კონფერენციის ფარგლებში აღნიშნული საკითხების განხილვა სხვადასხვა ქვეყნისა და ეკლესიის წარმომადგენელთა მონაწილეობით მიმდინარეობს და მიზნად ისახავს თანამედროვე გამოწვევებზე, საზოგადოებაში ღირებულებების როლსა და ეკლესიისა და სახელმწიფოს ურთიერთობის საკითხებზე მსჯელობას.

მართლმადიდებელ ჟურნალისტთა კავშირი წერდა, შიო III: რწმენით ნასაზრდოებმა ქართველმა შეძლო სარწმუნოების შენარჩუნება.

წაიკითხეთ ასევე