მართლმადიდებელი ეკლესია წმიდა მოწამეებს ტროფიმეს, საბატისა და დორიმედონტს მოიხსენიებს

წმინდა ტროფიმე, საბატი და დორიმედონტი. ფოტო: ღია წყარო

2 ოქტომბერს მართლმადიდებელი სამოციქულო ეკლესია წმიდა მოწამეებს — ტროფიმეს, საბატისა და დორიმედონტს მოიხსენიებს, რომლებიც ქრისტეს სარწმუნოებისთვის რომის იმპერატორ პრობუსის (276–282) დროს ეწამნენ.

ერთხელ, ანტიოქიაში წარმართული დღესასწაული იმართებოდა. ქალაქში საყოველთაო ღრეობა და კერპთმსახურება იყო გამართული. ანტიოქიაში ჩასული ქრისტიანები — ტროფიმე და საბატი — მწუხარებით შესცქეროდნენ უსჯულო ზეიმს და უფალს ევედრებოდნენ, გონდაბინდული ადამიანები ჭეშმარიტების გზაზე დაეყენებინა.

ქრისტეს ქადაგებისთვის წმიდა ტროფიმე და საბატი წარმართებმა შეიპყრეს და მმართველს მიჰგვარეს. წმიდანებს სასტიკად აწამებდნენ და აიძულებდნენ, უარი ეთქვათ ქრისტეს სარწმუნოებაზე და კერპებისთვის ეცათ თაყვანი. საბატი წამების დროს აღესრულა, ხოლო ტროფიმე ფრიგიის მმართველ დიონისესთან გაგზავნეს, რომელიც სისასტიკითა და დაუნდობლობით იყო ცნობილი.

დიონისემ მრავალი გზით სცადა წმიდა ტროფიმეს სარწმუნოებიდან გადადრეკა, თუმცა ვერ შეძლო. წმიდანი ურყევად აღიარებდა ქრისტეს და მხოლოდ ფსალმუნის სიტყვებს იმეორებდა: „მრავალ არიან ჭირნი მართალთანი და ყოვლისავე მისგან იჴსნნეს იგინი უფალმან“ (ფს. 33,19).

წმიდა ტროფიმე საპყრობილეში ჩააგდეს. მას იქ ფარულად აკითხავდა ქრისტეს მიმდევარი სენატორი დორიმედონტი. როდესაც მტარვალებმა ამის შესახებ შეიტყვეს, დორიმედონტიც შეიპყრეს და ქრისტეს სარწმუნოების უარყოფა მოსთხოვეს.

დორიმედონტმა მტკიცედ უარი განაცხადა და წმიდა ტროფიმესთან ერთად მხეცებს მიუგდეს დასაგლეჯად. თუმცა უფლის რჩეულებს ნადირებმა პირი არ დააკარეს. ამის შემდეგ მტარვალებმა წმიდა ტროფიმესა და დორიმედონტს თავები მოჰკვეთეს.

წმიდა მოწამეებმა სიცოცხლე ქრისტესთვის შეწირეს და ეკლესიამ მათი ხსენება 2 ოქტომბერს დააწესა.

მართლმადიდებელ ჟურნალისტთა კავშირმა დაწერა, ეკლესია იოანე ნათლისმცემლის მშობლებს მოიხსენებს.

წაიკითხეთ ასევე