სტუდენტები ბოლნისის ეპარქიაში გასვლით ლექციაზე იმყოფებოდნენ

სტუდენტები ბოლნისის ეპარქიაში გასვლით ლექციაზე. ფოტო: თბილისის სასულიერო აკადემია და სემინარია

2025 წლის 27 ნოემბერს თბილისის სასულიერო აკადემიისა და სემინარიის ქრისტიანული ფსიქოლოგიის ფაკულტეტის დეკანის, ისტორიის დოქტორ გრიგოლ ხაჭაპურიძის ხელმძღვანელობით სტუდენტებმა გასვლითი ლექცია ბოლნისის ეპარქიაში განახორციელეს.

სტუდენტებმა მოილოცეს ბოლნისის სიონის, წუღრუღაშენის წმინდა გიორგისა და წმინდა პეტრე და პავლე მოციქულების სახელობის სამონასტრო კომპლექსები. ასევე ეწვივნენ სულხან-საბა ორბელიანის სახლ-მუზეუმს სოფელ ტანძიაში, სადაც გაეცნენ საარქივო მასალებსა და ისტორიულ დოკუმენტებს.

ბოლნისის სიონში მამა შიო ბაკურიამ ჩაატარა სავედრებელი პარაკლისი და დალოცა სტუდენტები.

ტაძრის ეზოში ფილოლოგიის დოქტორმა ქეთევან მამასახლისმა წაიკითხა ლექცია ქვემო ქართლის ისტორიული მნიშვნელობისა და ქვეყნისა და ეკლესიის წინაშე ამ რეგიონის განსაკუთრებული როლის შესახებ. მან სტუდენტებს გააცნო ტაძრის კედლებზე შესრულებული უძველესი წარწერები, მოუყვა მათი ისტორიისა და შინაარსის შესახებ, ხაზი გაუსვა წარწერებში მოხსენიებულ ისტორიულ პირებსა და ხანმეტი მწერლობის ნიმუშებს.

ლექციის ფარგლებში ასევე გააცნეს სტუდენტებს დიდი ჰიმნოგრაფი მამა იოანე ბოლნელის პიროვნება და მისი ქადაგებების ძირითადი არსი. ღონისძიება ეძღვნებოდა საქართველოში ქრისტიანობის სახელმწიფო რელიგიად გამოცხადების 1700 წლისთავს.

მართლმადიდებელ ჟურნალისტთა კავშირი წერდა, თბილისის სასულიერო აკადემიის სტუდენტებმა ბეთანიასა და მანგლისში ლექცია-სემინარი გაიარეს.

წაიკითხეთ ასევე