საბერძნეთი კიევო-პეჩორის ლავრის აღდგენაში ჩაერთვება
საბერძნეთის მთავრობა იუნესკოს მსოფლიო მემკვიდრეობის ძეგლის რესტავრაციის კვლევებს დააფინანსებს და უკრაინასთან კულტურულ თანამშრომლობას გააღრმავებს.
ბერძნული საეკლესიო მედიის ინფორმაციით, საბერძნეთი მონაწილეობას მიიღებს კიევო-პეჩორის ლავრის აღდგენის პროცესში. ისტორიული მონასტრული კომპლექსი კიევზე ბოლო პერიოდში განხორციელებული თავდასხმების შედეგად მნიშვნელოვნად დაზიანდა.
საბერძნეთის კულტურის მინისტრმა ლინა მენდონიმ განაცხადა, რომ ქვეყანა დააფინანსებს იუნესკოს მსოფლიო მემკვიდრეობის ნუსხაში შეტანილი ძეგლის რესტავრაციისთვის აუცილებელი კვლევების მომზადებას. მისი თქმით, ინიციატივა მიზნად ისახავს როგორც კულტურული მემკვიდრეობის დაცვას, ისე უკრაინასთან კულტურული თანამშრომლობის გაძლიერებას.
კიევო-პეჩორის ლავრა აღმოსავლეთ ევროპის ერთ-ერთი უმნიშვნელოვანესი მართლმადიდებლური სიწმინდე და კულტურული მემკვიდრეობის გამორჩეული ძეგლია, რომლის ისტორია XI საუკუნიდან იწყება.
საბერძნეთის ინიციატივა დადებითად შეაფასა საბერძნეთის მართლმადიდებელი ეკლესიის მეთაურმა, უნეტარესმა არქიეპისკოპოსმა იერონიმე II-მ. მან კულტურის მინისტრს მადლობა გადაუხადა ისტორიული მონასტრის აღდგენის საქმეში მხარდაჭერისა და კულტურული მემკვიდრეობის დაცვისათვის.
შეგახსენებთ, რომ კიევ-პეჩერის ლავრის მიძინების ტაძარს რუსული თავდასხმის შედეგად ხანძარი გაუჩნდა.
