პატრიარქმა მორწმუნეებს ღვთის სასუფევლის ძიებისა და შვილების ქრისტიანულ ღირებულებებზე აღზრდისკენ მოუწოდა
სულთმოფენობიდან მეორე კვირას წარმოთქმულ ქადაგებაში უწმინდესმა და უნეტარესმა შიო III-მ ქრისტეს მოწოდების მნიშვნელობაზე, სიწმინდისკენ სწრაფვასა და თავმდაბლობის აუცილებლობაზე ისაუბრა.
სულთმოფენობიდან მეორე კვირას, ღირსი ათონელი მამების ხსენების დღეს, სრულიად საქართველოს კათოლიკოს-პატრიარქმა, მცხეთა-თბილისის მთავარეპისკოპოსმა და ბიჭვინთისა და ცხუმ-აფხაზეთის მიტროპოლიტმა შიო III-მ ქადაგებისას მორწმუნეებს ქრისტეს მოწოდებისადმი ერთგულებისა და ღვთის სასუფევლის პირველ რიგში ძიებისკენ მოუწოდა.
პატრიარქმა აღნიშნა, რომ სულთმოფენობის შემდეგ ეკლესია წმინდანებს წარმოშობს და მათი ცხოვრება ქრისტიანებისთვის მისაბაძ მაგალითად რჩება. ქადაგებისას მან გაიხსენა სახარებისეული ეპიზოდი, როდესაც უფალმა პირველ მოწაფეებს – პეტრეს, ანდრიას, იაკობსა და იოანეს – მოუწოდა და მათ დაუყოვნებლივ დატოვეს ყველაფერი, რათა ქრისტეს გაჰყოლოდნენ.
შიო III-ის განმარტებით, მოციქულებმა უფალში ისეთი მადლი და სულიერი სიმდიდრე დაინახეს, რომელიც ყოველგვარ მიწიერ სიკეთეს აღემატებოდა. ამ კონტექსტში პატრიარქმა გაიხსენა იგავები დაფლული განძისა და ძვირფასი მარგალიტის შესახებ და აღნიშნა, რომ ეს საუნჯე არის უფლის რწმენა და ღმერთთან კავშირი, რომელიც ადამიანს ნათლობიდანვე ეძლევა.
ქადაგებაში განსაკუთრებული ყურადღება დაეთმო ბავშვებისა და ახალგაზრდების სულიერ აღზრდას. პატრიარქის თქმით, ერთ-ერთი მიზეზი, რის გამოც ადამიანები ხშირად ვერ აფასებენ ღვთის მადლს, არის ის, რომ ბავშვობიდან არ ეზიარებიან ქრისტიანულ ღირებულებებს და არ იცნობენ მაღალი სულიერი ცხოვრების გამოცდილებას.
„აი, რა დიდი მნიშვნელობა აქვს იმას, რომ ჩვენი შვილები ბავშვობიდანვე ვაზიაროთ ქრისტიანულ ღირებულებებს, რომ ჩვენც ვუპასუხოთ უფლის ამ მოწოდებას და ჩვენი შვილებიც მივიყვანოთ ამასთან, რომ სიბნელეში კი არა, ნათელში ვიაროთ“, – აღნიშნა მან.
ქადაგების დასასრულს უწმინდესმა მორწმუნეებს სიწმინდისა და სრულყოფილებისკენ სწრაფვის, ასევე თავმდაბლობის მნიშვნელობა შეახსენა და განაცხადა, რომ ღვთის მადლის მოხვეჭა სწორედ ამ სათნოებით არის შესაძლებელი.
„შეგვეწიოს უფალი, რომ ყოველთვის გვესმოდეს ქრისტეს ხმა და ვუპასუხოთ მას სიწმინდისაკენ, სრულყოფილებისკენ სწრაფვით და იმით, რომ ჩავწვდეთ ცხოვრების უმთავრეს მიზანს – პირველად ვეძიებდეთ ღვთის სასუფეველს“, – განაცხადა პატრიარქმა.
მართლმადიდებელ ჟურნალისტთა კავშირი წერდა, კათოლიკოს-პატრიარქმა აფხაზეთის მთავრობის თავმჯდომარე გიორგი ჯინჭარაძე მიიღო.
