13 მაისს მართლმადიდებელი ეკლესია წმიდა მოციქულ იაკობ ზებედესს იხსენიებს
წმიდა იაკობი ქრისტეს 12 მოციქულთაგანი იყო და მოწამებრივად აღესრულა იერუსალიმში 44 წელს.
13 მაისს საქართველოს მართლმადიდებელი სამოციქულო ეკლესია იხსენიებს წმიდა მოციქულ იაკობ ზებედესს, რომელიც ქრისტეს 12 მოციქულთაგანი იყო. უფალმა იაკობს და მის ძმას — წმიდა მოციქულ იოანე ღვთისმეტყველს — ერთად მოუწოდა სამოციქულო მსახურებისთვის.
სულიწმიდის გარდამოსვლის შემდეგ წმიდა იაკობი ქრისტეს სახარებას ქადაგებდა ესპანეთსა და სხვა ქვეყნებში, მოგვიანებით კი იერუსალიმში დაბრუნდა. იგი ხალხს უქადაგებდა იესო ქრისტეს, როგორც მაცხოვარს და წმიდა წერილის სიტყვებით ამხელდა ფარისევლებსა და მწიგნობრებს ურწმუნოებისა და გულგრილობის გამო.
გადმოცემის თანახმად, იუდეველებმა ფილოსოფოსი და მოგვი ჰერმოგენი მოისყიდეს, რათა კამათში დაემარცხებინა მოციქული. თუმცა, ჰერმოგენის მოწაფე ფილიპემ ქრისტე ირწმუნა, მოგვიანებით კი თავად ჰერმოგენიც დარწმუნდა ღვთის ძალაში, დაწვა ჯადოქრული წიგნები, ნათელ-იღო და ქრისტიანად მოექცა.
წმიდა იაკობის ქადაგებამ მრავალი ადამიანის მოქცევა გამოიწვია, რის გამოც იუდეველებმა ჰეროდე აგრიპას ურჩიეს მოციქულის შეპყრობა და სიკვდილით დასჯა. წმიდა იაკობმა მშვიდად მიიღო განაჩენი და უკანასკნელ წუთებშიც განაგრძობდა ქრისტეს სჯულის ქადაგებას.
მისი დამსმენი იოსია მოციქულის სიმტკიცითა და სარწმუნოებით ისე მოიხიბლა, რომ თავადაც ირწმუნა ქრისტე. გადმოცემით, სიკვდილით დასჯის წინ იოსიამ მოციქულს შენდობა სთხოვა, წმიდა იაკობმა კი გულში ჩაიხუტა და უთხრა: „მშვიდობა შენდა და მიტევება“. ამის შემდეგ იოსიამ საჯაროდ აღიარა ქრისტე და წმიდა იაკობთან ერთად მოწამებრივად აღესრულა იერუსალიმში 44 წელს.
მართლმადიდებელ ჟურნალისტთა კავშირი წერდა, საქართველოს მართლმადიდებელ ეკლესიას 142-ე კათოლიკოს-პატრიარქი ჰყავს.
