რენეში სამრევლო სკოლის შეხვედრა აღდგომის თემაზე გაიმართა
ბავშვებმა და ახალგაზრდებმა სულიერ-აღმზრდელობით აქტივობებში მიიღეს მონაწილეობა და ქრისტიანული სიმბოლოების შესახებ ცოდნა გაიღრმავეს.
დასავლეთ ევროპის მიტროპოლიტ აბრაამის კურთხევითა და მთავარანგელოზ გაბრიელის სახელობის სამრევლოს მოძღვრის, დეკანოზ სპირიდონ გრიგოლაშვილის თანადგომითა და უშუალო მონაწილეობით, ქ. რენეში, 18 აპრილს, შაბათს, სამრევლო სკოლის მორიგი შეხვედრა გაიმართა.
შეხვედრა სულიერ-აღმზრდელობითი ხასიათის იყო და მიეძღვნა აღდგომის ბრწყინვალე დღესასწაულს. მონაწილეები აქტიურად ჩაერთვნენ დისკუსიაში, მონაწილეობა მიიღეს სხვადასხვა შემეცნებით აქტივობაში და უყურეს მულტფილმს წმინდა მოციქული თომას შესახებ. მათ ასევე დასვეს შეკითხვები და მიიღეს დეტალური განმარტებები.
ღონისძიების ფარგლებში განხილული იყო წითელი კვერცხის, ხატის პურისა და სანთლის სიმბოლური მნიშვნელობა. უფროსი ჯგუფის მოსწავლეებმა შეავსეს თემატური ტესტი და მიიღეს შესაბამისი დავალებები, ხოლო უმცროსებმა თემატური ნახატები გააფერადეს.
შეხვედრას უძღვებოდა სამრევლო სკოლის პედაგოგი თეა გოგიჩაიშვილი.
ორგანიზატორების თქმით, მსგავსი შეხვედრები განსაკუთრებით მნიშვნელოვანია ემიგრაციაში მცხოვრები ქართველი მართლმადიდებლებისთვის, რადგან ისინი ხელს უწყობს სულიერი ფასეულობების განმტკიცებას, ახალგაზრდების ქრისტიანულ აღზრდას და ქართული იდენტობის შენარჩუნებას.
მისამართია: 15 rue Sergent Guihard, 35000 Rennes
მართლმადიდებელ ჟურნალისტთა კავშირმა დაწერა, 18 აპრილი ოპტინის უდაბნოში მოკლული სამი ბერის ხსოვნის დღეა.
