კვიპროსის ეკლესია ღრმა მწუხარებას გამოთქვამს პატრიარქ ილია II-ის გარდაცვალების გამო
„კვიპროსის ეკლესია ღრმა მწუხარებას გამოთქვამს მოძმე საქართველოს ეკლესიის მწუხარებასთან დაკავშირებით, სრულიად საქართველოს კათოლიკოს-პატრიარქის, უწმინდესისა და უნეტარესის, ილია II-ის გარდაცვალების გამო“, - ნათქვამია კვიპროსის ეკლესიის მიერ გავრცელებულ ოფიციალურ სამძიმრის წერილში.
კვიპროსის ეკლესია მის უწმინდესობას, როგორც აღორძინების ეპოქის პატრიარქს, იხსენებს და აღნიშნავს, რომ ილია II-მ პატრიარქის ტახტი ქართული ეკლესიისთვის უაღრესად რთულ დროს დაიკავა.
წერილში ნათქვამია: „საბჭოთა კავშირის უღვთო კომუნისტურმა არეულობამ ძალადობრივად წაართვა საქართველოს ეკლესიას ავტოკეფალია. ილია II-ის ხელმძღვანელობით, ქართული ეკლესია ხელახლა დაიბადა და დაიბრუნა თავისი ცენტრალური ადგილი საზოგადოებაში“. სამძიმრის წერილი ასე გრძელდება:
„მისი უწმინდესობის პატრიარქ ილია II-ის სიყვარული კვიპროსის ეკლესიის მიმართ ყველაზე მკაფიოდ გამოიხატა 2014 წლის ოქტომბერში ჩვენს კუნძულზე მისი მომლოცველობის დროს, კვიპროსის უნეტარესი მთავარეპისკოპოსის, მისი უნეტარესობის, ქრიზოსტომოს II-ის მოწვევით. ექვსდღიანი ვიზიტის დროს, მისმა უწმინდესობამ პატრიარქმა მოილოცა კუნძულის ყველაზე წმინდა და პატივსაცემი ადგილები. საზეიმო იერარქიული საღვთო ლიტურგია აღევლინა ლარნაკაში, წმინდა ლაზარეს ისტორიულ ეკლესიაში. საღვთო ლიტურგიის დასასრულს, მთავარეპისკოპოსმა ქრიზოსტომოსმა პატრიარქს შემდეგი სიტყვებით მიმართა: „ჩვენთან ახლოს გრძნობთ თავს, როგორც ერთ-ერთ ჩვენიანს, რადგან ჩვენს ეკლესიებს შორის ბევრი მსგავსებაა და მათი რთული გზა ოცი ქრისტიანული საუკუნის განმავლობაში მსგავსი იყო“. ვიზიტის ფარგლებში ასევე მოინახულეს კიკოს წმინდა მონასტერი, წმინდა ირაკლიდიოსის მონასტერი, პანაგია ანგელოქტისტის ეკლესია, წმინდა ნეოფიტოსის მონასტერი და პაფოსში წმინდა პანაგია ქრიზოგიალიოტისას ქართული მონასტერი, სადაც მომლოცველთა დიდი რაოდენობა შეიკრიბა მისი კურთხევის მისაღებად.
წასვლამდე ცოტა ხნით ადრე, მისმა უწმინდესობა პატრიარქი დაემშვიდობა კვიპროსის მართლმადიდებელ ხალხს და სულიერი მემკვიდრეობა დაუტოვა: „ვლოცულობ კვიპროსის მშვიდობის, სიყვარულისა და ერთიანობისთვის“.
კვიპროსის ეკლესია გულწრფელ სამძიმარს უცხადებს საქართველოს დაძმობილებულ ეკლესიას, მის სასულიერო პირებსა და ხალხს და ლოცულობს, რომ უფალმა ნათელში ამყოფოს ნეტარი პატრიარქის სული.“
მართლმადიდებელ ჟურნალისტთა კავშირი წერდა, როგორია პატრიარქის არჩევის პროცედურა საქართველოს მართლმადიდებლურ ეკლესიაში?.
