გამოვიდა „საპატრიარქოს უწყებანის“ 2025 წლის მე-13 ნომერი
ახალი ნომერი მოიცავს ქადაგებებს, ქრონიკას, საეკლესიო ღონისძიებების მიმოხილვას და საგანმანათლებლო-ისტორიულ სტატიებს.
გამოიცა გაზეთ „საპატრიარქოს უწყებანის“ 2025 წლის მე-13 ნომერი, რომელიც მკითხველს სთავაზობს მრავალფეროვან და საინტერესო მასალებს, მათ შორის – მიტროპოლიტ შიოს (მუჯირი) ქადაგებებს, ქრონიკას, საეკლესიო სიახლეებსა და ღვთისმეტყველურ მასალებს.
ნომერში თავმოყრილია საპატრიარქო ტახტის მოსაყდრის ქადაგებები სულთმოფენობიდან 22-ე და 23-ე კვირებზე, ასევე ასი ათასი მოწამის დღესასწაულთან დაკავშირებულ პარაკლისზე წარმოთქმული სიტყვები.
ქრონიკის განყოფილებაში აისახა რამდენიმე მნიშვნელოვანი მოვლენა:
– ფინეთის ავტონომიური მართლმადიდებელი ეკლესიის მეთაურის ოფიციალური ვიზიტი საქართველოში;
– დიდ საიუბილეო თარიღებთან დაკავშირებული ღონისძიებები ქუთაის-გაენათის ეპარქიაში;
– აწყურის ყოვლადწმინდა ღვთისმშობლის მიძინების სახელობის ტაძრის აღდგენითი სამუშაოების დასრულების ეტაპი;
– სხვადასხვა ეპარქიებში მონასტრებისა და ტაძრების კურთხევა, განახლებული ტრაპეზების კურთხევა, ეკვდერების კურთხევა, ტაძრების საძირკვლების დადგმა, დაჯილდოებები, მილოცვები, ხელდასხმები და ბერად აღკვეცის ცერემონიები.
ნომერში გამოქვეყნებულია პატრიარქის ბრძანებები, სამძიმრის წერილები და განცხადებები, ასევე „შეცდომის გასწორების“ რუბრიკა.
სულიერი-თეოლოგიური მასალებიდან წარმოდგენილია სტატია წმინდა იოანე ოქროპირის სწავლებაზე ღვთის წყალობის შესახებ და ბერძნული გადმოცემები წმინდა გიორგის მოღვაწეობის შესახებ.
საპატრიარქოს საზოგადოებასთან ურთიერთობის სამსახურის განყოფილებაში გამოქვეყნებულია მცხეთა-თბილისის ეპარქიული კომისიის დასკვნა, ახალი გამოცემის – „ოკუპირებული მემკვიდრეობა“ – პრეზენტაციის მასალები და საინფორმაციო შეხვედრა ღირებულებითი განათლების პროექტის ფარგლებში. ნომერში ასევე მოთავსებულია ისტორიული ნარკვევი მღვდელ ლევან გურგენაშვილის შესახებ.
გაზეთის ახალი ნომერი რეალიზაციაშია ქვეყნის ტაძრებში, ჟურნალ-გაზეთების ჯიხურებსა და შესაბამის სტენდებზე.
მართლმადიდებელ ჟურნალისტთა კავშირი წერდა, მეუფე შიომ ღვთისმსახურება სენაკის წმინდა დიდმოწამე ბარბარეს ტაძარში აღავლინა.
