17 სექტემბერს მართლმადიდებელი ეკლესია ღირს სვიმეონ გარეჯელს მოიხსენიებს

დავითგარეჯი. ფოტო: მჟკ

17 სექტემბერს საქართველოს მართლმადიდებელი სამოციქულო ეკლესია ღირს სვიმეონ გარეჯელს მოიხსენიებს.

წმინდა სვიმეონ გარეჯელი დაახლოებით 1700 წელს კახეთში დაიბადა. იგი სიყრმიდანვე გარეჯის მონასტერში მოღვაწეობდა. ღვთისკაცი მრავალი წლის განმავლობაში უბრალო მონაზვნის ცხოვრებას ეწეოდა, მოგვიანებით კი მონასტრის ძმებმა წინამძღვრად აირჩიეს.

ღირსი მამა განსაკუთრებული სათნოებითა და სიმდაბლით გამოირჩეოდა. უფლისგან მას სასწაულთმოქმედების ნიჭი ჰქონდა მიმადლებული და მონასტრის ძმებისთვის სულიერი ცხოვრების მაგალითს წარმოადგენდა.

გადმოცემის მიხედვით, ერთხელ ღირსი სვიმეონი მძიმედ ავად გახდა და გარდაიცვალა. იგი ერთ საათზე მეტხანს უსულოდ იყო, თუმცა ღვთის განგებით კვლავ გაცოცხლდა. ამის შემდეგ წმინდა მამამ მონასტერში არსებული თავისი მცირე ქონება საკუთარი ხელით გაუნაწილა ძმებს და საბოლოოდ უარყო ყოველგვარი ამქვეყნიური საჭიროება.

როდესაც ეს ამბავი ღირსმა მამა სერაპიონმა შეიტყო, სხვების დახმარებით მივიდა მონასტერში. წინასწარმცნობელობის მადლით განათლებულმა სერაპიონმა წმინდა სვიმეონს მანუგეშებელი ცრემლებით მიმართა და მისი წმინდა ხელების ამბორით მადლობა შესწირა ღმერთს.

ნეტარმა მამებმა უკანასკნელად ნუგეშის ცრემლებით აკურთხეს ერთმანეთი. ღირსმა სვიმეონმა კიდევ ერთი კვირის განმავლობაში კეთილად მოაწესრიგა მონასტრის საქმეები.

1773 წლის 4 (17) სექტემბერს, ზუსტად იმ დღეს, როდესაც მისი სიკვდილის წინ ერთი საათის განმავლობაში უსულოდ იყო, ღირსმა სვიმეონ გარეჯელმა მშვიდობით მიაბარა სული უფალს.

წმინდა მამა გარეჯშია დაკრძალული და მისი ხსენება საქართველოს მართლმადიდებელი ეკლესიის კალენდარში 17 სექტემბერს აღინიშნება.

მართლმადიდებელ ჟურნალისტთა კავშირმა დაწერა, 16 სექტემბერს ეკლესია წმინდა მღვდელმოწამე ანთიმოზს, ნიკომიდიელ ეპისკოპოსს მოიხსენიებს.