ზუგდიდში წმინდა ნიკოლოზ საკვირველთმოქმედის ტაძრის საფუძველი იკურთხა

ისტორიული დღე ზუგდიდისა და ცაიშის ეპარქიაში. მიტროპოლიტი გერასიმე. ფოტო: ეპარქიის გვერდი

ზუგდიდისა და ცაიშის ეპარქიაში ისტორიული მნიშვნელობის მოვლენა აღინიშნა. მისმა მაღალყოვლადუსამღვდელოესობამ, ზუგდიდისა და ცაიშის მიტროპოლიტმა გერასიმემ, ეპარქიის სამღვდელოებასთან ერთად, ზუგდიდის წმინდა ნიკოლოზ საკვირველთმოქმედის სახელობის ტაძრის საფუძველი აკურთხა.

საფუძვლის კურთხევის მსახურებით, ტაძრის აღდგენისა და ახალი ეკლესიის მშენებლობის საქმეს ოფიციალურად დაედო სათავე. ეს დღე განსაკუთრებულად მნიშვნელოვანია როგორც ზუგდიდისა და ცაიშის ეპარქიისთვის, ისე ქალაქის ისტორიისა და სულიერი ცხოვრებისათვის.

ახალი ტაძარი იმ ტერიტორიაზე აშენდება, სადაც ტოტალიტარული რეჟიმის პერიოდში წმინდა ნიკოლოზ საკვირველთმოქმედის სახელობის ეკლესია განადგურდა. ათწლეულების შემდეგ ამავე ადგილზე კვლავ გაისმა ეკლესიის მშენებლობის დაწყების ლოცვა და შესრულდა ახალი ტაძრის საფუძვლის კურთხევა.

საფუძვლის კურთხევისას მიტროპოლიტმა გერასიმემ სასულიერო პირებთან ერთად აღავლინა შესაბამისი საეკლესიო ლოცვები და ტაძრის მშენებლობას ღვთის შეწევნა და მშვიდობით აღსრულება შესთხოვა.

ტაძრის მშენებლობის დაწყება ზუგდიდისთვის ისტორიული მემკვიდრეობისა და სულიერი ტრადიციის გაგრძელებას წარმოადგენს. განადგურებული ეკლესიის ადგილზე ახალი ტაძრის აღმართვა კი იმ ისტორიული ტკივილის ერთგვარი გამოძახილია, რომელიც ათწლეულების განმავლობაში ამ ადგილს უკავშირდებოდა.

ზუგდიდისა და ცაიშის ეპარქიაში იმედოვნებენ, რომ ახალი ტაძარი ქალაქის სულიერი ცხოვრების ერთ-ერთი მნიშვნელოვანი კერა გახდება და მომავალ თაობებს ქრისტიანული სარწმუნოებისა და ეროვნული ისტორიისადმი ერთგულებას კიდევ ერთხელ შეახსენებს.

მართლმადიდებელ ჟურნალისტთა კავშირი წერდა, ზუგდიდის ივერიის საკათედრო ტაძარში მიტროპოლიტმა გერასიმემ საკვირაო საღმრთო ლიტურგია აღავლინა.

წაიკითხეთ ასევე