1 ივლისს მართლმადიდებელი ეკლესია ღირს მიქაელ ულუმბოელის ხსენებას აღნიშნავს

ღირსი მიქაელ ულუმბოელი. ფოტო: ღია წყარო

1 ივლისს საქართველოს მართლმადიდებელი სამოციქულო ეკლესია ღირს მიქაელ ულუმბოელის ხსენების დღეს აღნიშნავს.

ღირსი მიქაელ ულუმბოელი VI საუკუნეში საქართველოში ჩამოსულ ცამეტ ასურელ მამათაგან ერთ-ერთი იყო. გადმოცემის თანახმად, ყოვლადწმინდა ღვთისმშობლის კურთხევით წმინდა იოანე ზედაზნელმა თორმეტი მოწაფე შეარჩია და მათთან ერთად საქართველოში ჩამოვიდა, რათა ქვეყანაში ქრისტიანული სარწმუნოება განემტკიცებინა. ამ რჩეულ მამებს შორის იყო ღირსი მიქაელიც.

მცხეთაში ასურელ მამებს მეფე ფარსმანი და კათოლიკოსი ევლავიოსი დახვდნენ. მათი კურთხევით წმინდა იოანე და მისი მოწაფეები ზედაზნის მთაზე დასახლდნენ, სადაც მკაცრი ასკეტური ცხოვრებით მოღვაწეობდნენ. მოგვიანებით, ღვთისმშობლის გამოცხადების შემდეგ, წმინდა იოანემ მოწაფეები საქართველოს სხვადასხვა მხარეში საქადაგებლად გაგზავნა.

ღირსი მიქაელ ულუმბოელი ზემო ქართლსა და ოსეთში მოღვაწეობდა. მან ულუმბოს მახლობლად დააარსა დიდი სამონასტრო სავანე, რომელიც მრავალი საუკუნის განმავლობაში სულიერი ცხოვრების ერთ-ერთ მნიშვნელოვან ცენტრს წარმოადგენდა. გადმოცემით, წმინდანის წმინდა ნაწილები სწორედ ამ სავანეში განისვენებდა.

სამწუხაროდ, დღეს ღირსი მიქაელ ულუმბოელის საფლავის ზუსტი ადგილსამყოფელი უცნობია. ისტორიული წყაროების მიხედვით, 1795 წელს, აღა-მაჰმად-ხანის შემოსევის დროს, ულუმბოს მამათა მონასტერი განადგურდა. მოგვიანებით, ლეკიანობისა და სხვა მძიმე ისტორიული მოვლენების გამო სოფელი დაიცალა, ხოლო დროთა განმავლობაში ხალხის მეხსიერებაში გაწყდა ცოდნა წმინდანის განსასვენებლის ზუსტი მდებარეობის შესახებ.

მიუხედავად ამისა, ღირსი მიქაელ ულუმბოელი დღესაც განსაკუთრებული პატივით იხსენიება ქართული ეკლესიის მიერ, როგორც ცამეტ ასურელ მამათაგან ერთ-ერთი, რომელმაც თავისი ღვაწლით მნიშვნელოვანი წვლილი შეიტანა საქართველოში ქრისტიანული სარწმუნოების განმტკიცებასა და სამონასტრო ცხოვრების განვითარებაში.

ადრე მართლმადეიდებელ ჟურნალისტთა კავშირი წერდა, რომ 26 ივნისს მართლმადიდებელი ეკლესია წმინდა ანთიმოზ ივერიელს მოიხსენიებს.

წაიკითხეთ ასევე