ღვთისმშობლის ტაძარი 7 დეკემბერს საზეიმო გახსნისთვის ემზადება, - BBC

საფრანგეთის პრეზიდენტი პარიზის არქიეპისკოპოსის ლორან ულრიხის თანხლებით საკათედრო ტაძარს ეწვია. ფოტო: reuters

მსოფლიოში ერთ-ერთი ყველაზე ცნობილი ტაძარი და პარიზის სავიზიტო ბარათი, ღვთისმშობლის ტაძარი მზად არის 7 დეკემბერს საზეიმო გახსნისთვის გამანადგურებელი ხანძრის შემდეგ, რესტავრაციას ხუთ წელზე მეტი დასჭირდა. 29 ნოემბერს საფრანგეთის პრეზიდენტი ემანუელ მაკრონი ჟურნალისტებთან ერთად ტაძარს ეწვია, იუწყება BBC News.

„ხანძრიდან ხუთ წელზე მეტი ხნის შემდეგ ღვთისმშობლის ტაძარი ფერფლიდან აღდგა და შთამბეჭდავ სანახაობად იქცა“, - წერს ბრიტანული გამოცემა.

მაკრონს ტაძრის დათვალიერებისას მისი მეუღლე ბრიჯიტი და პარიზის არქიეპისკოპოსი ლორან ულრიხი ახლდნენ. ხანძრის დღეს საფრანგეთის პრეზიდენტმა პირობა დადო, რომ ისტორიული შენობა მთლიანად აღდგება და ეს მისი პრეზიდენტობის დროს მოხდებოდა. მრავალწლიანი სარემონტო სამუშაოების განმავლობაში მან რამდენჯერმე მოინახულა სამშენებლო მოედანი და აკონტროლებდა პროცესს.

საფრანგეთის პრეზიდენტმა მადლობა გადაუხადა ყველას, ვინც შენობის რესტავრაციაში მონაწილეობდა: „თქვენ შექმენით თქვენი ალქიმია აქ, ამ ადგილზე, ნახშირი აქციეთ ხელოვნებად“.

ტაძრის აღდგენა ქვეყანას 700 მილიონი ევრო დაუჯდა. ამ თანხის ნაწილი კერძო ინვესტორებმა გამოყვეს. პროექტის არქიტექტორების თქმით, გადახურვისთვის საჭირო ხის მასალა, ძირითადად მუხა, მთელი საფრანგეთიდან შეგროვდა. სწორედ ტაძრის ეს ნაწილი – სახურავი და შპილი – წარმოადგენდა უდიდეს პრობლემას რესტავრაციის დროს. სამუშაოებში 250 სამშენებლო კომპანია და ასობით სპეციალისტი იყო ჩართული.

ხანძარი ღვთისმშობლის ტაძარში 2019 წლის აპრილში გაჩნდა. ცეცხლმა გაანადგურა სახურავი, ორი კოშკი და შპილი, ასევე ხის კონსტრუქციული ელემენტები. მეხანძრეები, 500-ზე მეტი ადამიანი, ცეცხლს ცხრა საათზე მეტი ხნის განმავლობაში ებრძოდნენ.

ახლა ნოტრ-დამის ცნობილი 96 მეტრიანი შპილი კვლავ აღმართულია პარიზის თავზე. გავრცელებული ინფორმაციით, ტაძრის ხელმძღვანელობა ელოდება შეკვეთით დამზადებული ავეჯის მიწოდებას. ყველაფერი დანარჩენი მზად არის საზეიმო გახსნისთვის 7 დეკემბერს და შობის დღესასწაულზე.

როგორც მჟკ იტყობინება, საფრანგეთის კულტურის ყოფილმა მინისტრმა როზელინ ბაშელოტმა განაცხადა, რომ საფრანგეთის პირველ ლედის ბრიჯიტ მაკრონს სურდა ღვთისმშობლის ტაძრისთვის ფალოსის სახით ოქროს ბურთებით შპილის აღმართვა.