კვირას ათონის მთაზე ბოლო ორი თვის განმავლობაში ყველაზე ძლიერი მიწისძვრა დაფიქსირდა

ათონის წმინდა მთა. ფოტო: orthodoxianewsagency.gr

ბოლო ორი თვის განმავლობაში ათონის უმეტეს ნაწილში დაფიქსირდა ინტენსიური სეისმური აქტივობა. ამან გამოიწვია შეშფოთება ბერებსა და მოსახლეობაში, ასევე მეცნიერებში, რომლებიც ყურადღებით აკვირდებიან ამ სეისმურ მდგომარეობას, წერს ვებგვერდი orthodoxianewsagency.gr.

წმიდა მთაზე თითქმის ყოველდღე ხდება სხვადასხვა სიმძლავრის მიწისძვრები, მაგრამ აქამდე ისინი შედარებით სუსტი იყო. ყველაზე შესამჩნევი 4,6 მაგნიტუდის ბიძგი რიხტერის შკალით ათონის მთაზე კვირას, 22 სექტემბერს დაფიქსირდა.

სეისმოლოგები თვლიან, რომ სამონასტრო რესპუბლიკის მაცხოვრებლები არ უნდა ინერვიულონ - ექსპერტები რიხტერის შკალით 6 ბალზე ძლიერ მიწისძვრას არ ელიან.

„რა თქმა უნდა, ეს არ ნიშნავს, რომ უფრო ძლიერი მიწისძვრა არ შეიძლება მოხდეს. ძალიან ფრთხილად უნდა ვიყოთ...“ - განაცხადა სეისმოლოგიის პროფესორმა მანოლის სკორდილისმა.

ათონელ ბერებს სთხოვენ გამოიჩინონ სიფრთხილე და არ გამოიყენონ ძველი „ავარიული“ შენობები.

როგორც მჟკ წერს, სეისმოლოგებმა განაცხადეს, რომ ათონის დასავლეთ სანაპიროზე სეისმური აქტივობა დაფიქსირდა.