პატრიარქმა ბართლომემ რუსეთის მართლმადიდებლური ეკლესია დედაეკლესიის მიმართ უმადურობაში დაადანაშაულა

პატრიარქი ბართლომეოსი. ფოტო: orthodoxianewsagency

კონსტანტინოპოლის პატრიარქმა ბართლომემ საბერძნეთში, კილკისის წმინდა გიორგის მონასტერში ეპისკოპოსთა კრებაზე გამოსვლისას რუსეთის მართლმადიდებლური ეკლესია ფანარის მიმართ უმადურობის გამო გააკრიტიკა, იუწყება Orthodoxtimes.com. ბართლომემ ხაზგასმით აღნიშნა, რომ სწორედ კონსტანტინოპოლის საპატრიარქოა „დედა ეკლესია“ რუსეთის მართლმადიდებლური ეკლესიისა და სხვა მართლმადიდებლური ეკლესიებისთვის, რომლებიც დროთა განმავლობაში „მიუბრუნდნენ თავიანთ კეთილისმყოფელს“.

„ყველა უყურებს მსოფლიო საპატრიარქოს, როგორც ღირსშესანიშნაობას, მართლმადიდებლობის ცენტრს, მოსიყვარულე დედა ეკლესიას. გარდა ალექსანდრიის, ანტიოქიის და იერუსალიმის უძველესი საპატრიარქოებისა, ისევე როგორც კვიპროსის ეკლესიისა, ყველა ახალ ეკლესიას - მათ შორის უმადურ რუსულ ეკლესიას - ფესვები აქვს მსოფლიო საპატრიარქოში“, - განაცხადა პატრიარქმა. მან აღნიშნა, რომ ამ ეკლესიებიდან ბევრი ოდესღაც კონსტანტინოპოლის იურისდიქციაში იყო ავტოკეფალიის მიღებამდე, მაგრამ ზოგიერთმა მათგანმა მოგვიანებით დაიწყო მოქმედება დედა ეკლესიის ინტერესების საწინააღმდეგოდ.

პატრიარქმა განსაკუთრებული ყურადღება გაამახვილა უკრაინაში რელიგიურ საკითხთან დაკავშირებით არსებულ ვითარებაზე. მან გაიხსენა, რომ 2018 წელს მოსკოვის პატრიარქი კირილი ცდილობდა დაეყოლიებინა მსოფლიო საპატრიარქო უკრაინის ეკლესიისთვის ავტოკეფალიის მინიჭებისგან, მაგრამ მისი ძალისხმევა ჩაიშალა. „მათ [რუსებს] სჯეროდათ, რომ მათი არყოფნა კრეტას საბჭოში იყო მიზეზი იმისა, რომ ფანარი უკრაინის ავტოკეფალიას გამოაცხადებდა. მაგრამ მათ ვერაფერს მიაღწიეს და მალე მსოფლიო საპატრიარქომ ავტოკეფალია მიანიჭა უკრაინის ეკლესიას, აღიარა ჩვენი 40-45 მილიონი უკრაინელი ძმებისა და დების უფლება ჰქონოდათ დამოუკიდებელი ეკლესია მოსკოვის კონტროლისგან თავისუფალი“, - განაცხადა ბართლომემ.

მან ასევე გამოთქვა რწმენა, რომ სხვა ადგილობრივი ეკლესიები, რომლებსაც ჯერ არ უღიარებიათ უკრაინის მართლმადიდებელი ეკლესიის ავტოკეფალია, საბოლოოდ მიჰყვებიან კონსტანტინოპოლის მაგალითს.

ფანარის მეთაურმა ასევე გააკრიტიკა რუსეთის მართლმადიდებლური ეკლესიის პოზიცია 2016 წელს მართლმადიდებელი ეკლესიის წმინდა და დიდი კრების ადგილმდებარეობის შესახებ. მან აღნიშნა, რომ რუსეთმა უარი თქვა კონსტანტინოპოლში კრების ჩატარებაზე წმინდა ირინეს ტაძარში, გუმბათზე ნახევარმთვარის გამო. „თითქოს რუსეთს არ აქვს ათეისტური კომუნიზმის ნამგალი და ჩაქუჩი, მაგრამ ნახევარმთვარე აწუხებდათ მათ“, - განაცხადა პატრიარქმა.

ამასთან, კონსტანტინოპოლის პატრიარქმა ხაზი გაუსვა მართლმადიდებლური ეკლესიების ერთიანობის შენარჩუნებისა და მათი კონსტრუქციული თანამშრომლობის მნიშვნელობას. „ჩვენ ერთად ვქმნით ერთ წმიდა კათოლიკურ და სამოციქულო ეკლესიას და ერთი ხმით უნდა ვილაპარაკოთ და ერთ ღმერთს ვერწმუნოთ“, - დაასკვნა მან.

როგორც მჟკ იტყობინება, ბულგარეთის ეკლესიამ პატრიარქი ბართლომეოსი განხეთქილების დაძლევისთვის დააჯილდოვა.