რუსეთის მართლმადიდებლური ეკლესიის პატრიარქი არციზის მთავარეპისკოპოსის მოწოდებას ,,შეეშვას უმე-ს’’ გამოეხმაურა

პატრიარქი კირილი. ფოტო: сайт Московской патриархии

რუსეთის მართლმადიდებელი ეკლესიის პატრიარქი არციზის მთავარეპისკოპოსი ვიქტორის წერილს გამოეხმაურა, რომელიც ოდესის ფერისცვალების საკათედრო ტაძრის დანგრევის შემდეგ დაწერა. რუსეთის მართლმადიდებელი ეკლესიის მეთაურის პასუხი მოსკოვის საპატრიარქოს ვებგვერდზეა განთავსებული.

პატრიარქმა კირილმა აღნიშნა უმე-ს იერარქის "მკვეთრი და უკიდურესად გაბედული მიმართვის ტონი", რომელიც შეაფასა, როგორც იერარქის "ძლიერი ემოციური შოკის მდგომარეობა".

რუსეთის მართლმადიდებლური ეკლესიის მეთაურის თქმით, ტაძრის დანგრევა მან ძლიერ განიცადა, მისთვის ძნელია ,,ამ გრძნობის სიტყვებით გადმოცემა’’, რადგან მან თავად აკურთხა ეს ტაძარი 2010 წელს.

ამასთან, პატრიარქმა კირილმა მთავარეპისკოპოსის ბრალდებებს „რბილად რომ ვთქვათ, უსაფუძვლო და უსამართლო“ უწოდა.

რუსეთის მართლმადიდებელი ეკლესიის მეთაურის თქმით, უმე-ის ეპისკოპოსმა თავის წერილში აჩვენა „ფაქტებისადმი შერჩევითი მიდგომა“, რაც „ასეთ სიტუაციებში სრულიად შეუსაბამოა“.

პატრიარქმა კირილმა, ოდესაზე რუსული სარაკეტო დარტყმის ვითარებაში, მიზანშეწონილად მიიჩნია იმის შეხსენება, რომ „ეკლესიების ნგრევა, მშვიდობიანი მოსახლეობის სიკვდილი და ტანჯვა დაიწყო დონბასში ცხრა წლის წინ“. მას შემდეგ „მთელი რუსული ეკლესია გლოვობს ყოველ დანგრეულ ან დაზიანებულ სალოცავს“, ასევე „ლოცულობს ყოველი გარდაცვლილისთვის და მათთვის, ვინც კონფლიქტის დროს დაკარგა ნათესავები და მეგობრები“.

რუსეთის მართლმადიდებლური ეკლესიის მეთაურმა ასევე გაიხსენა, რომ „ღვთის ეკლესია დაფუძნებულია ქრისტეს სიყვარულის კლდეზე“, მისმა მსახურებმა ფრთხილად უნდა იმოქმედონ, „და არ მისცენ მიზეზი მათ, ვინც მიზეზს ეძებს (2 კორ. 11: 11), რათა ეკლესიას ჭრილობები არ მიაყენოს უყურადღებო საჯარო განცხადებებით“.

მანამდე მჟკ წერდა, რომ უმე-ის იერარქმა ოდესის საკათედრო ტაძრის დაბომბვის შემდეგ პატრიარქ კირილს მიმართა.