„თორაძის საერთაშორისო მუსიკალური ფესტივალი“ დავით თორაძის შემოქმედებითი საღამოთი გაიხსნა
თბილისის ოპერისა და ბალეტის თეატრში გამართული ღონისძიება ილია II-ის ხსოვნას მიეძღვნა; ფესტივალი 18 ივნისის ჩათვლით კონცერტებსა და მასტერკლასებს უმასპინძლებს.
საქართველოს კულტურის სამინისტროსა და ფონდი „ქართული გალობის“ მხარდაჭერით, თბილისის ოპერისა და ბალეტის სახელმწიფო თეატრში „თორაძის საერთაშორისო მუსიკალური ფესტივალი“ დავით თორაძის შემოქმედებითი საღამოთი საზეიმოდ გაიხსნა.
ღონისძიება სრულიად საქართველოს კათოლიკოს-პატრიარქის, ილია II-ის ხსოვნას მიეძღვნა. კონცერტს საქართველოს კულტურის მინისტრი თინათინ რუხაძე, ვიცე-პრემიერი და საგარეო საქმეთა მინისტრი მაკა ბოჭორიშვილი, ასევე საქართველოს პრეზიდენტის მეუღლე თამარ ბაგრატიონი დაესწრნენ.
საღამოში მონაწილეობდნენ ქართული და საერთაშორისო მუსიკალური სცენის ცნობილი შემსრულებლები: სოპრანო იანო ალიბეგაშვილი, ბანი გიორგი ანდღულაძე, მევიოლინე ლელა მჭედლიძე, მომღერალი ნატო მეტონიძე და ვოკალისტი ლეონარდო ლოპეს დიასი. მსმენელის წინაშე ასევე წარდგნენ თბილისის ოპერის ორკესტრი მაესტრო ნიკა ნიკვაშვილის ხელმძღვანელობით და მეკო ქავთარაძის ახალგაზრდული კაპელა.
კონცერტის პროგრამა დავით თორაძის შემოქმედების მნიშვნელოვან ნიმუშებს აერთიანებდა და მოიცავდა კინო-, საოპერო და საბალეტო მუსიკას.
ღონისძიებაზე სიტყვით გამოსვლისას კულტურის მინისტრმა თინათინ რუხაძემ აღნიშნა, რომ დღე განსაკუთრებული იყო, რადგან ლექსო თორაძის დაბადების დღეს ემთხვეოდა და ამავდროულად ოთხი წელი შესრულდა მისი გარდაცვალებიდან.
„სიმბოლურია, რომ თორაძეების სახელთან დაკავშირებული ფესტივალი, რომელიც მუსიკისა და ხელოვნების ნამდვილ ზეიმად იქცა, წელს უკვე მეოთხედ იმართება. სასიხარულოა, რომ ამ დიდ მუსიკალურ დინასტიას ნინო თორაძის შვილიშვილი გააგრძელებს, ხოლო დავით თორაძის მუსიკა მსოფლიო მსმენელისთვის კვლავ ხელმისაწვდომი იქნება“, – განაცხადა მინისტრმა.
დავით თორაძისა და გამოჩენილი ქართველი პიანისტის, ალექსანდრე (ლექსო) თორაძის ხსოვნისადმი მიძღვნილი ფესტივალი 18 ივნისის ჩათვლით გაგრძელდება. ფესტივალის ფარგლებში დაგეგმილია კონცერტები, მასტერკლასები და სხვა კულტურული ღონისძიებები, რომლებიც კლასიკური მუსიკის პოპულარიზაციასა და ახალგაზრდა თაობის ჩართულობას შეუწყობს ხელს.
მართლმადიდებელ ჟურნალისტთა კავშირი წერდა, ეროვნული ბანკი საკოლექციო მონეტებს გამოუშვებს.
