20 მაისს ზედაზნობა აღინიშნება — 13 ასურელი მამის ხსენების დღე და ზედაზნის მონასტრის ცნობილი სასწაული
მართლმადიდებელი ეკლესია 20 მაისს ზედაზნობის დღესასწაულს აღნიშნავს. თარიღი უკავშირდება 13 ასურელ მამას, რომლებმაც საქართველოში ქრისტიანული ცხოვრების განმტკიცებაში განსაკუთრებული როლი შეასრულეს.
20 მაისს საქართველოს მართლმადიდებელი ეკლესია ზედაზნობის დღესასწაულს აღნიშნავს — 13 ასურელი მამის ხსენების დღეს. VI საუკუნეში საქართველოში ჩამოსულმა ასურელმა მამებმა უდიდესი გავლენა მოახდინეს ქართული მონასტრული ცხოვრების ჩამოყალიბებასა და სულიერი ტრადიციების განმტკიცებაზე. მათ შორის განსაკუთრებული ადგილი უჭირავს წმინდა იოანე ზედაზნელს, რომლის სახელთანაც დაკავშირებულია ზედაზნის მონასტერი.
ზედაზნის მონასტერს უკავშირდება ერთ-ერთი ყველაზე ცნობილი და ხშირად მოხსენიებული სასწაულებრივი მოვლენა, რომელიც 1993 წლის 23 მაისს, ზედაზნობის დღესასწაულიდან მესამე დღეს მოხდა.
მონასტერში სტუმრად მისული რამდენიმე ადამიანი ტაძრის მახლობლად სუფრას მიუჯდა. ამინდი მოულოდნელად შეიცვალა და ძლიერი წვიმა დაიწყო. სტუმრებმა სუფრა მონასტრის სტოაში შეიტანეს, სადაც ქეიფი გაგრძელდა. ამ დროს, თვითმხილველთა მონათხრობის მიხედვით, ზედაზნის მთაზე რამდენჯერმე ჩამოვარდა მეხი, ბოლოს კი ტაძრის მიმდებარედ გამოჩნდა „ცეცხლოვანი დისკო“, რომელმაც ძლიერი ნათება და გამაყრუებელი ხმა გამოიწვია.
მომხდარს თან ახლდა ძლიერი გრუხუნი, კედლებიდან ქვების ჩამოცვენა და ჭურჭლის უცნაური ფორმით დამსხვრევა. თვითმხილველები ამბობდნენ, რომ ტაძარი თითქოს შეირხა, შემდეგ კი ყველაფერი მოულოდნელად დაცხრა და წვიმაც ერთიანად შეწყდა.
მონასტერში მყოფი ადამიანები ამ მოვლენას სასწაულად მიიჩნევდნენ. მათი თქმით, მომხდარმა მოქეიფეები ძლიერ შეაშინა და მათ სინანულის განცდით დატოვეს მონასტერი.
ზედაზნის მონასტერი საუკუნეების განმავლობაში ერთ-ერთ უმნიშვნელოვანეს სულიერ ცენტრად ითვლება საქართველოში და დღემდე უამრავი მომლოცველისა და მორწმუნის ყურადღების ცენტრში რჩება.
მართლმადიდებელ ჟურნალისტთა კავშირი წერდა, ოჯახის სიწმინდისა და მშობლების პატივისცემის დღე საქართველოში ყოველი წლის 17 მაისს აღინიშნება.
