გორში განრღვეულის კვირას მიტროპოლიტმა ანდრიამ საზეიმო ლიტურგია აღავლინა
ღვთისმსახურებაში უცხოელი სასულიერო პირები და გიორგი მთაწმინდელის გალობის უნივერსიტეტის გუნდები მონაწილეობდნენ.
3 მაისს, აღდგომიდან მეოთხე კვირას — განრღვეულის კვირას, გორისა და ატენის მიტროპოლიტმა ანდრიამ საღვთო ლიტურგია აღავლინა გორში, ყოვლადწმინდა ღვთისმშობლის შობის საკათედრო ტაძარში.
საზეიმო მსახურებაში მონაწილეობდნენ რუმინეთისა და რუსეთის მართლმადიდებელი ეკლესიების სასულიერო პირები, მათ შორის კლუჟის ღირსი ონოფრე დიდის მონასტრის წინამძღვარი არქიმანდრიტი ბესარიონი, მონაზონი იოანე, მღვდელი კლავდიოსი და სანქტ-პეტერბურგის წმინდა კეთლმსახურ თავად ალექსანდრე ნეველის სახელობის ტაძრის იეროდიაკონი იოაკიმე.
ღვთისმსახურება გაამშვენეს ღირსი გიორგი მთაწმინდელის გალობის უნივერსიტეტის ვაჟთა და გოგონათა გუნდებმა, რომლებმაც ტრადიციული ქართული საგალობლები შეასრულეს.
ლიტურგიის დასასრულს მიტროპოლიტმა ანდრიამ ქადაგებით მიმართა მრევლს და აღნიშნა:
„ისმენდით მათ გალობას — ჩვენს ტრადიციულ, ისტორიულ, საუკუნოვან საგალობლებს, რომლებიც აღესრულებოდა საქართველოს ეკლესია-მონასტრებში. ეს ახალგაზრდები ეუფლებიან ჩვენს წინაპართა მდიდარ სულიერ მემკვიდრეობას.“
მართლმადიდებელ ჟურნალისტთა კავშირი წერდა, „ქუთაისქალაქობის“ დღესასწაულზე მიტროპოლიტმა იოანემ სამშვიდობო პარაკლისი აღავლინა.
