მეუფე მიქაელი: „რაც კარგი იქნება, მივიღებთ“ — სინოდის სხდომა პროცესუალურ საკითხებს დაეთმობა
საპატრიარქოში მიმდინარე სხდომაზე სამი კანდიდატის დასახელება, სავარაუდოდ, შემდეგ სინოდზე მოხდება.
საქართველოს საპატრიარქოში ამ წუთებში წმინდა სინოდის სხდომა მიმდინარეობს, რომელიც მიმდინარე და მნიშვნელოვანი საკითხების განხილვას ეძღვნება.
სხდომის დაწყებამდე ფშავ-ხევსურეთის ეპისკოპოსმა, მეუფე მიქაელმა მედიასთან განაცხადა, რომ ის მხარს უჭერს ყველაფერს, რაც ღვთის ნებას შეესაბამება.
„მე ვუჭერ მხარს ყველაფერს იმას, რასაც ღმერთი ინებებს. რაც კარგი იქნება, ყველაფერს მივიღებთ, რაც ცუდი იქნება, რატომ მივიღებთ?! თქვენ ხომ იცით, რომ გაკეთდება განცხადება და ყველა კითხვას ამომწურავი პასუხი გაეცემა,“ — აღნიშნა მეუფე მიქაელმა.
დეკანოზ ანდრია ჯაღმაიძის განმარტებით, დღევანდელი სინოდის სხდომა ძირითადად პროცესუალური საკითხების მოწესრიგებას დაეთმობა. მისივე თქმით, სამი კანდიდატის გამოცხადება სავარაუდოდ შემდეგ სინოდის სხდომაზე მოხდება.
საპატრიარქოს მხრიდან დამატებითი დეტალები სხდომის დასრულების შემდეგ გახდება ცნობილი.
მართლმადიდებელ ჟურნალისტთა კავშირი წერდა, საპატრიარქოსთან სინოდის წევრები იკრიბებიან.
