საპატრიარქო რუსეთის დაზვერვის განცხადებას ეხმაურება — „მსგავსი ჩარევა წარმოუდგენელია“
დეკანოზ ანდრია ჯაღმაიძე გავრცელებულ ინფორმაციას უსაფუძვლოს უწოდებს და სხვა ეკლესიების მხრიდან ჩარევას გამორიცხავს.
საქართველოს საპატრიარქოს საზოგადოებასთან ურთიერთობის სამსახურის ხელმძღვანელი, დეკანოზი ანდრია ჯაღმაიძე რუსეთის საგარეო დაზვერვის სამსახურის მიერ გავრცელებულ განცხადებას გამოეხმაურა და აღნიშნა, რომ მსგავსი ტიპის ჩარევა სხვა ადგილობრივი ეკლესიის მხრიდან „წარმოუდგენელია“.
როგორც ჯაღმაიძემ „ფორმულასთან“ განაცხადა, აღნიშნული ინფორმაცია საფუძველს მოკლებულია და მისი სისწორე გაურკვეველია.
„მსგავსი ჩარევა სხვა ადგილობრივი ეკლესიის მხრიდან, რომელიც არ უნდა იყოს, ჩვენთვის წარმოუდგენელია და მიგვაჩნია ეს სრულიად შეუძლებლად. უცნობია ამ გავრცელებული ინფორმაციის საფუძველი“, — განაცხადა მან.
რუსეთის საგარეო დაზვერვის სამსახურმა მანამდე გაავრცელა განცხადება, რომელშიც მსოფლიო პატრიარქ ბართლომეოსი საქართველოს მართლმადიდებელი ეკლესიის შიდა საქმეებში ჩარევის მცდელობაში დაადანაშაულა.
მათივე მტკიცებით, ბართლომეოსი ცდილობს ილია მეორის გარდაცვალების შემდეგ შექმნილი ვითარებით ისარგებლოს და საქართველოს ეკლესიაზე გავლენა გააძლიეროს. ამავე განცხადებაში დასახელებულია კათოლიკოს-პატრიარქის შესაძლო კანდიდატებიც — დასავლეთ ევროპის მიტროპოლიტი აბრაამი (გარმელია) და ფოთისა და ხობის მიტროპოლიტი გრიგოლი (ბერბიჭაშვილი).
მართლმადიდებელ ჟურნალისტთა კავშირი წერდა, პარლამენტმა ილია II-ის ხსოვნას წუთიერი დუმილით პატივი მიაგო.
