UNESCO-მ „ქართული ხორბლის კულტურა მსოფლიო არამატერიალური მემკვიდრეობის ნუსხაში შეიტანა
ნიუ-დელიში გამართულ სესიაზე მიღებული გადაწყვეტილება საქართველოს მრავალსაუკუნოვან ცოდნას, ენდემურ სახეობებსა და ხორბლთან დაკავშირებულ ტრადიციებს საერთაშორისო დონეზე წარმოაჩენს.
UNESCO-ს არამატერიალური კულტურული მემკვიდრეობის დაცვის მთავრობათაშორისი კომიტეტის 20-ე სესიის გადაწყვეტილებით, „ქართული ხორბლის კულტურა: ტრადიციები და რიტუალები“ კაცობრიობის არამატერიალური კულტურული მემკვიდრეობის წარმომადგენლობით ნუსხაში შევიდა. ისტორიული გადაწყვეტილება ნიუ-დელიში (ინდოეთის რესპუბლიკა) გამართულ სხდომაზე გამოცხადდა.
UNESCO-ს ნაბიჯი წარმოადგენს ქართველი ხალხის უწყვეტი შრომის, ცოდნისა და პრაქტიკის აღიარებას. ეს გადაწყვეტილება ხაზს უსვამს ქართული ენდემური ხორბლის უნიკალურობას, რომლის კულტურა საუკუნეების განმავლობაში აერთიანებდა როგორც სულიერ, ისე მატერიალურ ტრადიციებს.
აღიარება ასევე გამოხატავს პასუხისმგებლობას მომავალი თაობების წინაშე — უზრუნველყონ ამ ფასეული „არამატერიალური კულტურული ელემენტის“ სიცოცხლისუნარიანობა, დაცვა და განვითარება.
„ქართული ხორბლის კულტურა: ტრადიციები და რიტუალები“ საქართველოს მთავრობის 2024 წლის 27 მარტის №98 დადგენილებით უკვე მიენიჭა ეროვნული მნიშვნელობის კატეგორია. UNESCO-სთვის საქართველოს მიერ 2024 წლის 28 მარტს წარდგენილმა ნომინაციამ განხილვის ყველა ეტაპი წარმატებით და დაყოვნების გარეშე გაიარა.
მართლმადიდებელ ჟურნალისტთა კავშირმა ადრე გაავრცელა ინფორმაცია, რომ 11 დეკემბერს ღირსმოწამე სტეფანე ახლის, ირინარხეს და შვიდი წმიდა დედის დღე აღინიშნება.
