170 წელი გავიდა საქართველოს კათოლიკოს-პატრიარქის, კირიონ II-ის დაბადებიდან
1855 წლის 10 ნოემბერს დაიბადა გამორჩეული სასულიერო მოღვაწე, ისტორიკოსი, მეცნიერი და მღვდელმთავარი — კირიონ II, რომლის ღვაწლმა გადამწყვეტი მნიშვნელობა იქონია საქართველოს ეკლესიის ავტოკეფალიის აღდგენის საქმეში.
კირიონ II (ერისკაცობაში გიორგი საძაგლიშვილი) დაიბადა 1855 წლის 10 ნოემბერს. მისი ოჯახი დიდი წვლილი მიუძღოდა კავკასიის მთიელთა შორის ქრისტიანობის გავრცელებაში. მღვდელი იერონიმე საძაგლიშვილი, კირიონის მამა, მსახურობდა ოსებსა და დიდოელებს შორის და ცდილობდა ქრისტიანული ტრადიციების აღდგენას.
გიორგი საძაგლიშვილი სწავლობდა ანანურისა და გორის სასწავლებლებში, შემდეგ კი თბილისის სემინარიასა და კიევის აკადემიაში. 1876 წელს ღვთისმეტყველების კანდიდატის ხარისხი მიიღო და მრავალი წელი ქართულ სასწავლებლებში ასწავლიდა.
ცოლ-შვილის გარდაცვალების შემდეგ, 1896 წელს, კირიონმა ბერობა აიღო და ქვაბთახევის მონასტრის წინამძღვრად დაინიშნა. დიდი მოღვაწეობა გასწია ძველი ქართული ხელნაწერების, ისტორიული ძეგლებისა და ზეპირსიტყვიერების შესაგროვებლად — მისი შემოწირული ხელნაწერები დღესაც ინახება მუზეუმებში.
კირიონის მღვდელმთავრული გზა 1898 წლიდან იწყება, როცა იგი ალავერდის ეპისკოპოსად აკურთხეს. მოგვიანებით, გორისა და სხვა ეპარქიებში მსახურობდა და მუდამ იცავდა ქართული ეკლესიის უფლებებს. აქტიურად იბრძოდა რუსეთის იმპერიის მიერ გაუქმებული საქართველოს ეკლესიის ავტოკეფალიის აღდგენისათვის, რის გამოც არაერთხელ დევნეს და გადააყენეს სამსახურიდან.
მისი მოღვაწეობა მოიცავდა არა მხოლოდ ეკლესიურ, არამედ კულტურულ, საგანმანათლებლო და ეროვნული თვითშეგნების გაძლიერების საქმესაც.
კირიონ II გახდა საქართველოს ეკლესიის დამოუკიდებლობის სიმბოლო — მღვდელმთავარი, რომელმაც სიცოცხლე შესწირა სარწმუნოების, ერისა და ეკლესიის თავისუფლებას.
დღეს, 10 ნოემბერს, საქართველოს მართლმადიდებელი ეკლესია პატივისცემით იხსენებს მისი უწმინდესობის დაბადების 170 წლის იუბილეს — დიდი მღვდელმთავრისა და ქართველი სულიერების ერთ-ერთი უმნიშვნელოვანესი ფიგურის ხსენების დღედ.
მართლმადიდებელ ჟურნალისტთა კავშირი წერდა, სურამისა და ხაშურის ეპარქიის დაარსებიდან 12 წელი აღინიშნა.
