თელავში საპატრიარქოსა და შალვა ამონაშვილის აკადემიის ერთობლივი სემინარი გაიმართა
ბუშეტის „მზიანეთში“ გაიმართა ღირებულებითი განათლების კლუბების სასულიერო ხელმძღვანელთა ყოველწლიური შეხვედრა.
2025 წლის 20 ოქტომბერს, საქართველოს საპატრიარქოს საზოგადოებასთან ურთიერთობის სამსახურსა და შალვა ამონაშვილის აკადემიას შორის თანამშრომლობის ფარგლებში, თელავის მუნიციპალიტეტის სოფელ ბუშეტში, მომავლის ქალაქ „მზიანეთში“ გაიმართა სემინარი თემაზე — „პედაგოგიური და მისიონერული გამოცდილებების გაზიარება“.
ღონისძიება წარმოადგენს ღირებულებითი განათლების კლუბების ხელმძღვანელი სასულიერო პირების ახალი ნაკადის მესამე ყოველწლიურ შეხვედრას, რომელიც მიზნად ისახავს განათლების სფეროში მოღვაწე სასულიერო პირებს შორის გამოცდილების გაზიარებას და თანამედროვე საგანმანათლებლო მიდგომების გაცნობას.
სემინარის მსვლელობისას პროფესორმა შალვა ამონაშვილმა მონაწილეებს გაუზიარა თავისი მრავალწლიანი პედაგოგიური გამოცდილება, ისაუბრა ჰუმანური პედაგოგიკის პრინციპებზე, ასევე გააცნო აკადემიის ისტორია, საქმიანობის მიმართულებები და მიმდინარე პროექტები.
ღონისძიება ნაყოფიერ და მეგობრულ გარემოში წარიმართა, სადაც მონაწილეებმა განიხილეს სკოლების მუშაობასთან, მოსწავლეთა მოტივაციასთან და ღირებულებითი განათლების პრაქტიკულ განხორციელებასთან დაკავშირებული საკითხები.
მართლმადიდებელ ჟურნალისტთა კავშირი წერდა, ეპარქიებში განახლდა გაცნობითი და საბაზო გადამზადების შეხვედრები.
