შაშიანში VI საუკუნის ქვითკირით ნაშენი საწნახელი და მარანი აღმოაჩინეს

შაშიანის სამება. ფოტო: ღია წყარო

გურჯაანის მუნიციპალიტეტის სოფელ შაშიანში, სამების სახელობის ბაზილიკის სარეაბილიტაციო სამუშაოების მიმდინარეობისას, VI საუკუნით დათარიღებული ქვითკირით ნაშენი საწნახელი და მარანი აღმოაჩინეს.

როგორც ისტორიკოსი თამაზ მარკოზაშვილი აცხადებს, ნაგებობები 2024-2025 წლებში, ბაზილიკის სარეაბილიტაციო სამუშაოების დროს გამოვლინდა. მისი ინფორმაციით, საწნახელი და მარანი ტაძრის თანადროულია და VI საუკუნით თარიღდება.

საწნახელს ბაზილიკის სამხრეთ ფასადიდან დაახლოებით ორი მეტრის დაშორებით მიაკვლიეს, მიწის სქელი ფენის აღების შემდეგ.

ისტორიკოსის შეფასებით, აღმოჩენილი საწნახელი კახეთის რეგიონში ერთ-ერთი უძველესი ქვითკირის საწნახელია. მისი არსებობა მიუთითებს, რომ გურჯაანის მუნიციპალიტეტში მევენახეობა-მეღვინეობის კულტურა ადრეულ შუა საუკუნეებში უკვე მაღალ დონეზე იყო განვითარებული.

აღმოჩენილმა არქეოლოგიურმა ობიექტებმა შაშიანის სამების სახელობის ბაზილიკისა და მთლიანად რეგიონის ისტორიული მნიშვნელობა კიდევ უფრო გამოკვეთა.

მართლმადიდებელ ჟურნალისტთა კავშირი წერდა, რუსთავში, სანაპიროს ქუჩაზე IV–VI საუკუნეების კოლექტიური სამარხები აღმოაჩინეს.

წაიკითხეთ ასევე