დღეს საქართველოს მართლმადიდებელი ეკლესია წმინდა გიორგი მთაწმინდელს მოიხსენიებს

გიორგი მთაწმინდელი. ფოტო: ღია წყარო

საქართველოს მართლმადიდებელი სამოციქულო ეკლესია 10 ივლისს წმინდა გიორგი მთაწმინდელის ხსენების დღეს აღნიშნავს.

წმინდა გიორგი მთაწმინდელი 1009 წელს თრიალეთში, ღვთისმოსავი ქრისტიანების – იაკობისა და მარიამის ოჯახში დაიბადა. მცირე ასაკიდანვე მონასტრულ ცხოვრებას ეზიარა. სწავლობდა ტაძრისისა და ხახულის მონასტრებში, სადაც სულიერი და საგანმანათლებლო აღზრდა იმ დროის გამორჩეული მამების ხელმძღვანელობით მიიღო.

მოგვიანებით იგი კონსტანტინოპოლში სწავლობდა, სადაც ღრმა ცოდნა შეიძინა ფილოსოფიასა და რიტორიკაში. მონაზვნად აღკვეცის შემდეგ მოღვაწეობდა შავ მთაზე, შემდეგ კი ათონის წმინდა მთაზე გაემგზავრა, სადაც ღირსი ექვთიმე ათონელის დაწყებული საქმის ღირსეული გამგრძელებელი გახდა.

წმინდა გიორგი მთაწმინდელმა ბერძნულიდან ქართულ ენაზე თარგმნა მრავალი საეკლესიო წიგნი, შეასწორა ძველი თარგმანები და ქართული საღვთისმეტყველო მწერლობა განსაკუთრებულ სიმაღლეზე აიყვანა. მისი ღვაწლით გამდიდრდა ქართული ეკლესიის ლიტურგიკული და სასულიერო მემკვიდრეობა.

იგი ასევე წლების განმავლობაში ხელმძღვანელობდა ათონის ივერთა მონასტერს, ზრუნავდა მის განვითარებასა და ქართველი ბერების სულიერ ცხოვრებაზე. განსაკუთრებული მნიშვნელობა ჰქონდა მის მოღვაწეობას საქართველოს ეკლესიის ავტოკეფალიისა და მოციქულებრივი ღირსების დაცვაში, რასაც მან ანტიოქიის პატრიარქთან გამართულ საუბრებში მტკიცედ და ბრძნულად გაუსვა ხაზი.

მეფე ბაგრატ IV-ის თხოვნით წმინდა გიორგი გარკვეული ხნით საქართველოში დაბრუნდა, სადაც საეკლესიო ცხოვრების მოწესრიგებაში მნიშვნელოვანი წვლილი შეიტანა. მოგვიანებით კვლავ ათონს გაემართა, თუმცა კონსტანტინოპოლში ყოფნისას, წმინდა მოციქულთა პეტრესა და პავლეს დღესასწაულზე, მშვიდობით აღესრულა.

წმინდა გიორგი მთაწმინდელი დაკრძალულია ათონის ივერთა მონასტერში. მართლმადიდებელი ეკლესია მას ქართველთა ერთ-ერთ უდიდეს სულიერ მამად, გამოჩენილ მთარგმნელად, მწერალად და ეკლესიის ერთგულ დამცველად მიაგებს პატივს.

მართლმადეიდებელ ჟურნალისტთა კავშირი წერდა, რომ 1 ივლისს მართლმადიდებელი ეკლესია ღირს მიქაელ ულუმბოელის ხსენებას აღნიშნავს.

წაიკითხეთ ასევე