მიტროპოლიტმა აბრაამმა არქიმანდრიტ ანტონ (კანდელაკს) მრავალწლიანი მსახურებისთვის მადლობა გადაუხადა
არქიმანდრიტი ანტონი (კანდელაკი)
დასავლეთ ევროპის მიტროპოლიტმა აბრაამმა (გარმელია) არქიმანდრიტ ანტონ (კანდელაკს), რომელიც 2008 წლიდან დასავლეთ ევროპის ეპარქიაში მსახურობდა, მრავალწლიანი ნაყოფიერი მოღვაწეობისთვის მადლობა გადაუხადა.
მიტროპოლიტის განცხადებით, სამშობლოდან შორს, უცხოეთში მოძღვრობა განსაკუთრებულ სირთულესთან არის დაკავშირებული, რადგან სასულიერო პირს ყოველდღიურად უწევს იმ თანამემამულეების გვერდით დგომა, რომლებიც ხშირად მარტოობისა და სულიერი მხარდაჭერის ნაკლებობის წინაშე დგანან.
როგორც მეუფე აბრაამი აღნიშნავს, არქიმანდრიტმა ანტონმა ეს გამოწვევა დაუღალავი შრომითა და თავდადებული მსახურებით დაძლია. წლების განმავლობაში იგი პარიზსა და საფრანგეთის სხვადასხვა ქალაქში არაერთი ქართველისთვის საყვარელ და პატივსაცემ მოძღვრად იქცა.
მიტროპოლიტის შეფასებით, მამა ანტონმა შეძლო 14 სამრევლოს ჩამოყალიბება, მრავალი განბნეული ქართველის ეკლესიის წიაღში შეკრება და მათთვის სულიერი საზრდოს მიწოდება.
მისი ღვაწლი მხოლოდ საეკლესიო მსახურებით არ შემოიფარგლებოდა. მისი ხელმძღვანელობით დაარსდა სამრევლო სკოლა ბავშვებისთვის, ჩამოყალიბდა საეკლესიო გუნდი, ქართული სიმღერისა და ცეკვის ანსამბლები, რომლებმაც არაერთი თაობა აღზარდეს. განსაკუთრებული ყურადღება ეთმობოდა ქართული ენის, კულტურისა და ტრადიციების შენარჩუნებას, ხოლო კონცერტებისა და ფესტივალების მეშვეობით ქართული კულტურა მრავალ უცხოელსაც გაეცნო.
ახლა, მრავალწლიანი პირნათელი მსახურების შემდეგ, არქიმანდრიტი ანტონი დასავლეთ ევროპის ეპარქიას ტოვებს და სასულიერო მოღვაწეობის გასაგრძელებლად საქართველოში ბრუნდება.
მიტროპოლიტმა აბრაამმა მადლობა გადაუხადა მამა ანტონს გაწეული ღვაწლისთვის და უფალს შესთხოვა, აკურთხოს მისი მომავალი მსახურება, სიმტკიცე და ძალა მიმადლოს, რათა კვლავაც ღირსეულად ემსახუროს ღმერთსა და ეკლესიას.
დასასრულს, მეუფე აბრაამმა აღნიშნა, რომ მისი და მთელი ეპარქიის სახელით არქიმანდრიტ ანტონ კანდელაკს ოფიციალური მადლობა ეცხადება მრავალწლიანი ერთგული და თავდადებული მსახურებისთვის.
მართლმადიდებელ ჟურნალისტთა კავშირი წერდა, ასპინძაში სული წმინდის მშენებარე ტაძრისთვის ცხოველსმყოფელი ჯვარი აკურთხეს და გუმბათზე აღმართეს.
წაიკითხეთ ასევე
თბილისში წმინდა ნინოს ეკლესიის რეაბილიტაცია იგეგმება
შიო ჩიტაძის ქუჩაზე მდებარე ისტორიული ტაძრის პროექტი კონსტრუქციული მდგომარეობის გაუმჯობესებას, დაზიანებების აღმოფხვრასა და ავთენტური სახის შენარჩუნებას ითვალისწინებს.
სვეტიცხოვლის სარეაბილიტაციო სამუშაოების მომზადებაში იტალიური კომპანია ჩაერთო
კულტურის მინისტრი მაია ბითაძე ტაძარში არსებულ მდგომარეობასა და დაგეგმილ სამუშაოებს ადგილზე გაეცნო — კვლევები საერთაშორისო ექსპერტებისა და ქართველი სპეციალისტების მონაწილეობით წარიმართება.
მეუფე გიორგი: „ტექნოლოგია უნდა ემსახურებოდეს ადამიანს და არა პირიქით“
მარნეულისა და ჰუჯაბის ეპისკოპოსი ციფრული ფულის საკითხზე ფართო საზოგადოებრივი განხილვის, პირადი ცხოვრების დაცვისა და ნაღდი ფულის გამოყენების შესაძლებლობის შენარჩუნების აუცილებლობაზე საუბრობს.
მიტროპოლიტმა იოანემ წმინდა კვიპრიანესა და იუსტინას ტაძარში პარაკლისი აღასრულა
ღვთისმსახურება წმინდა დიდმოწამეთა დავით და კონსტანტინე მხეიძეების, მღვდელმოწამე კვიპრიანესა და ქალწულმოწამე იუსტინას ხსენების დღეს გაიმართა.
ფილადელფიაში სვეტიცხოვლობა საზეიმო ღვთისმსახურებით აღინიშნა
საღმრთო ლიტურგია ჩრდილოეთ ამერიკის ეპისკოპოსმა საბამ აღავლინა — მრევლს ღვთისმშობლის წილხვდომილობის ხატისა და წმინდა გაბრიელ ბერის წმინდა ნაწილების მოლოცვის შესაძლებლობა მიეცა.
საქართველოს საპატრიარქო განცხადებას ავრცელებს
საქართველოს საპატრიარქო 14 ოქტომბერს სამთავროს მონასტერში აღვლენილ ღვთისმსახურებასთან დაკავშირებით გავრცელებულ ინფორმაციას გამოეხმაურა და საეკლესიო თანამსახურების წესზე განმარტება გაავრცელა.