სტეფანწმინდის წმინდა მთავარანგელოზ მიქაელის სახელობის საკათედრო ტაძარი

სტეფანწმინდის წმინდა მთავარანგელოზ მიქაელის სახელობის საკათედრო ტაძარი. ფოტო: მჟკ

სტეფანწმინდის წმინდა მთავარანგელოზ მიქაელის სახელობის საკათედრო ტაძარი ხევის ეპარქიის მთავარი სულიერი და ადმინისტრაციული ცენტრია. სწორედ აქ აღესრულება ეპარქიის უმნიშვნელოვანესი საეკლესიო მსახურებები, ყოველდღიური წირვა-ლოცვა, საეკლესიო საიდუმლოებები და სხვა მნიშვნელოვანი საეკლესიო ღონისძიებები.

ტაძარი თანამედროვე ეპოქაში აშენდა, რათა სრულფასოვნად მოემსახუროს ხევის რეგიონს. მიუხედავად იმისა, რომ ყაზბეგის მუნიციპალიტეტი გამორჩეულია მრავალსაუკუნოვანი სიწმინდეებით, მათ შორის გერგეტის ყოვლადწმინდა სამების ტაძრითა და თრუსოს ხეობის უძველესი ეკლესია-მონასტრებით, წმინდა მთავარანგელოზ მიქაელის სახელობის საკათედრო ტაძარი დღეს ეპარქიის მთავარ საეკლესიო კერას წარმოადგენს. აქ, მღვდელმთავრის ლოცვა-კურთხევით, სრულდება მღვდლებისა და დიაკვნების ხელდასხმაც.

სტეფანწმინდისა და ხევის ეპარქიას საქართველოს მართლმადიდებელი ეკლესიის მთავარეპისკოპოსი იეგუდიელი (ერისკაცობაში – გოჩა ბენიამინის ძე ტაბატაძე) ხელმძღვანელობს. იგი 1964 წლის 30 იანვარს, ჭიათურის მუნიციპალიტეტის სოფელ ზედა ბერეთისაში დაიბადა.

მომავალი მღვდელმთავარი სწავლობდა საგურამოს საშუალო სკოლაში, მოგვიანებით კი ტექნიკურ სასწავლებელსა და საქართველოს ტექნიკურ უნივერსიტეტში. სამხედრო სამსახურის გავლის შემდეგ მონაწილეობდა სამაჩაბლოში სამშვიდობო მისიაში და სხვადასხვა სფეროში საქმიანობდა. მოგვიანებით კი, როგორც თავად აღნიშნავს, ცხოვრებისეულმა განსაცდელებმა ღვთის სამსახურისკენ მიიყვანა.

1994 წელს მან მონასტრული ცხოვრება აირჩია. იმავე წლის შობის მარხვაში ბერად აღიკვეცა და სახელად იეგუდიელი ეწოდა. 1995 წელს უწმინდესმა და უნეტარესმა, სრულიად საქართველოს კათოლიკოს-პატრიარქმა ილია II-მ იგი ჯერ ბერ-დიაკვნად, შემდეგ კი მღვდელ-მონაზვნად აკურთხა. მისი პირველი სამღვდელო მსახურება ქვათახევის მონასტერში შედგა, მოგვიანებით კი მოღვაწეობა ხევის მხარეში, აჩხოტის წმინდა ნიკოლოზის მონასტერში განაგრძო.

2000 წელს იღუმენის, 2002 წელს კი არქიმანდრიტის ხარისხი მიენიჭა. 2003 წლის 2 სექტემბერს სვეტიცხოვლის საპატრიარქო ტაძარში ეპისკოპოსად აკურთხეს. თავდაპირველად იგი თიანეთისა და ფშავ-ხევსურეთის ეპარქიას ხელმძღვანელობდა, შემდეგ – ბოლნისის ეპარქიას, ხოლო 2006 წლიდან სტეფანწმინდისა და ხევის ეპარქიის მმართველია. 2009 წელს მას მთავარეპისკოპოსის წოდება მიენიჭა.

2003 წლის 14 სექტემბერს ეპისკოპოსმა იეგუდიელმა ჩაატაარა პირველი სამღვდელმთავრო წირვა ახლად შექმნილ ეპარქიაში. 2004 წლის 27 ივნისს წმიდა სინოდის გადაწყვეტილებით გადაყვანილ იქნა ბოლნისის ეპარქიის მმართველად.
2006 წლის დეკემბრიდან ხელმძღვანელობს სტეფანწმიდისა და ხევის ეპარქიას.

მთავარეპისკოპოს იეგუდიელის ხელმძღვანელობით ხევის ეპარქიაში აქტიურად მიმდინარეობს საეკლესიო ცხოვრების განვითარება. აღდგება ისტორიული ტაძრები, ძლიერდება სამონასტრო ცხოვრება, ტარდება სულიერ-საგანმანათლებლო ღონისძიებები და განსაკუთრებული ყურადღება ეთმობა მრევლის სულიერ აღზრდას.

დღეს სტეფანწმინდის წმინდა მთავარანგელოზ მიქაელის სახელობის საკათედრო ტაძარი არა მხოლოდ ეპარქიის მთავარი ტაძარია, არამედ ხევის რეგიონის მართლმადიდებლური ცხოვრების, რწმენისა და ეროვნული სულიერი ტრადიციის ერთ-ერთი უმნიშვნელოვანესი საყრდენიც.

წაიკითხეთ ასევე