22 მაისს აღინიშნება აღმოყვანება ნაწილთა წმ. ნიკოლოზ საკვირველთმოქმედისა

წმინდა ნიკოლოზის ტაძარი ბარში. ფოტო: მჟკ

1087 წელს, მაისში, ქალაქ მირიკიდან (სადაც წმინდანის უხრწნელი ნაწილები იყო დასვენებული) წმინდა ნიკოლოზის ნაწილები იტალიის ქალაქ ბარში გადაასვენეს.

მაჰმადიანთა შემოსევების გამო, ქრისტიანებს სიწმინდის შებღალვის საფრთხე ემუქრებოდათ. ბარელმა და ვენეციელმა მეზღვაურებმა ნაწილების გადარჩენა შეძლეს და ისინი ბარში საზეიმოდ დააბრძანეს.

გადმოცემის თანახმად, წმინდა ნიკოლოზი სიზმრით გამოეცხადა ერთ-ერთ მღვდელს და უბრძანა, მისი ნაწილები უსაფრთხო ადგილას გადაესვენებინათ.

მიუხედავად იმისა, რომ მთავარი ხსენების დღედ 19 დეკემბერი (ნიკოლოზობა) ითვლება, 22 მაისის დღესასწაული განსაკუთრებით უყვართ როგორც საქართველოში, ისე მთელ მართლმადიდებლურ სამყაროში.

ამ დღეს საქართველოს ყველა მოქმედ მართლმადიდებლურ ტაძარში საზეიმო წირვა-ლოცვა აღევლინება.

მართლმადიდებელ ჟურნალისტთა კავშირი წერდა, სრულიად საქართველოს კათოლიკოს-პატრიარქი სადღესასწაულო წირვას შიომღვიმის მამათა მონასტერში აღავლენს.