მიტროპოლიტი ანდრია: „ვინც მხარდაჭერა გამოხატა, ყველას მადლობას ვუხდი“

გორისა და ატენის მიტროპოლიტი ანდრია. ფოტო: ეპარქიის გვერდი

გორისა და ატენის მიტროპოლიტმა ანდრია გვაზავამ ქადაგებისას მადლობა გადაუხადა ყველა იმ ადამიანს, ვინც ბოლო დღეებში საქართველოს ეკლესიისა და მისი პიროვნების მიმართ მხარდაჭერა და ნდობა გამოხატა.

მიტროპოლიტის განცხადებით, ბოლო პერიოდში ადგილი ჰქონდა გარკვეულ შფოთსა და გაუგებრობას, რასაც თან ახლდა ჭორებიც. ამ კონტექსტში მან ომარ ხაიამის სიტყვები გაიხსენა: „თავს ნუ იმართლებ იმიტომ, რომ მეგობარს შენი ისედაც სჯერა, მტერი კი მაინც არ დაგიჯერებსო“. მისი თქმით, განსაკუთრებით მნიშვნელოვანია იმ ადამიანების მხარდაჭერა, რომლებმაც ნდობა გამოხატეს.

საკითხი აქტუალური გახდა მას შემდეგ, რაც 30 აპრილს ტელეკომპანია „ფორმულამ“ გაავრცელა ინფორმაცია, რომ მიტროპოლიტ ანდრია გვაზავა საპატრიარქო არჩევნებში საკუთარი კანდიდატურის დაყენებას განიხილავდა. გავრცელებული ცნობებით, აღნიშნულმა მოსაყდრე შიო მუჯირის მხარდამჭერთა ნაწილის შეშფოთება გამოიწვია. ამავე ინფორმაციით, სხდომაზე გაჟღერდა მინიშნებები მიტროპოლიტის მიმართ შესაძლო „ზნეობრივ დარღვევაზე“, რაც სინოდის წევრთა ნაწილმა ღია მუქარად აღიქვა.

საბოლოოდ, არსებული ვითარების ფონზე, მიტროპოლიტმა ანდრია გვაზავამ საპატრიარქო არჩევნებში საკუთარი კანდიდატურის დაყენებაზე უარი განაცხადა.

შეგახსენებთ, რომ 28 აპრილს სინოდმა საპატრიარქო ტახტის სამი კანდიდატი დაასახელა: მოსაყდრე შიო მუჯირი, ფოთისა და ხობის მიტროპოლიტი გრიგოლ ბერბიჭაშვილი და მროველ-ურბნელი მიტროპოლიტი იობ აქიაშვილი. კენჭისყრის შედეგად, მეუფე შიომ 20 ხმა მიიღო, ხოლო დანარჩენმა ორმა კანდიდატმა — შვიდ-შვიდი. საბოლოო გადაწყვეტილებას საქართველოს მართლმადიდებელი ეკლესიის გაფართოებული კრება მიიღებს.

მართლმადიდებელ ჟურნალისტთა კავშირის ცნობით, რომის სამრევლოში მსახურების წესზე განცხადება გაავრცელა დასავლეთ ევროპის ეპარქიამ.

წაიკითხეთ ასევე