ეკვადორში მსახურების დროს ჩამოვარდნილმა ჯვარმა კათოლიკე მღვდელი იმსხვერპლა
გუაიაკილის არქიეპარქიამ პატრისიო ალფრედო სანჩეს მოლინარის გარდაცვალება დაადასტურა — ღვთისმსახურება სოციალურ ქსელში პირდაპირ ეთერში გადაიცემოდა.
2026 წლის 17 ოქტომბერს ეკვადორის ქალაქ გუაიაკილში, პერპეტუო სოკოროს ეკლესიაში, ღვთისმსახურების დროს ტრაგიკულად დაიღუპა კათოლიკე მღვდელი პატრისიო ალფრედო სანჩეს მოლინარი. საკურთხევლის უკან, კედელზე დამაგრებული დიდი ხის ჯვარი მოულოდნელად ჩამოვარდა და სასულიერო პირს დაეცა. მსახურება პირდაპირ ეთერში გადაიცემოდა, რის გამოც შემთხვევა ვიდეოჩანაწერშიც აისახა.
ტაძარში მყოფმა მორწმუნეებმა მღვდლის დახმარება სცადეს და სასწრაფო სამედიცინო დახმარება მოითხოვეს. მისი გარდაცვალება გუაიაკილის არქიეპარქიამ ოფიციალური განცხადებით დაადასტურა. განცხადებაში თანაგრძნობა გამოუცხადეს მღვდლის ოჯახის წევრებს, ახლობლებსა და რედემპტორისტთა კონგრეგაციას, რომლის წევრიც მამა პატრისიო იყო.
მედიის ცნობით, ტრაგედიამდე რამდენიმე წუთით ადრე სასულიერო პირი ქადაგებისას ადამიანის სიცოცხლის წარმავლობასა და ღმერთთან ურთიერთობის მნიშვნელობაზე საუბრობდა.
„ძვირფასო ძმებო, ერთ დღეს ყველა ჩვენგანი, ვინც აქ ვართ, მოვკვდებით“, — მიმართა მან მორწმუნეებს. ქადაგებისას მღვდელმა ყურადღება გაამახვილა იმაზეც, თუ რას უთმობს ადამიანი საკუთარ დროს და რამდენად მნიშვნელოვანია მისი სულიერი ცხოვრებისათვის გამოყენება.
ჯვრის ჩამოვარდნის მიზეზი გავრცელებულ ოფიციალურ განცხადებაში განმარტებული არ ყოფილა. არქიეპარქიას არც ის დაუზუსტებია, მღვდელი ადგილზე გარდაიცვალა თუ სამედიცინო დახმარების გაწევის შემდეგ.
მართლმადიდე ბელ ჟურნალისტების კავშირმა ადრე გაავრცელა ინფორმაცია, რომ ჩრდილოეთ ირლანდიაში, რომის კათოლიკე მღვდელი სასტიკად სცემეს მის ბოლო წირვაზე.
