14 აგვისტოს ეკლესია უფლის ცხოველმყოფელი ჯვრის შემოყვანებას იხსენიებს
დღესასწაულის ისტორია კონსტანტინოპოლში ჯვრის ქუჩებში შემოტარების უძველეს ტრადიციას უკავშირდება, რომლის მიზანიც ქალაქის საკურთხებლად და სნეულებათაგან დასაცავად უფლის პატიოსანი ჯვრის ძალის მოხმობა იყო.
14 აგვისტოს მართლმადიდებელი სამოციქულო ეკლესია აღნიშნავს უფლის პატიოსანი და ცხოველმყოფელი ჯვრის შემოყვანების დღესასწაულს.
1897 წლის ბერძნული ჟამნის ცნობით, კონსტანტინოპოლში უძველესი დროიდან არსებობდა ტრადიცია, რომლის მიხედვითაც აგვისტოს თვეში უფლის პატიოსან ჯვარს ქალაქის ქუჩებში დაატარებდნენ. ეს ჩვეულება იმ პერიოდში ქალაქში სნეულებათა ხშირ გავრცელებას უკავშირდებოდა.
დღესასწაულის წინა დღეს, 31 ივლისს, სიწმინდეს დიდი პატივით გამოაბრძანებდნენ ბიზანტიის იმპერატორთა კარის ეკლესიიდან, სადაც იგი ინახებოდა, და წმინდა სოფიას ტაძრის ტრაპეზზე დაასვენებდნენ. ამ დროს სრულდებოდა წყალკურთხევის მსახურებაც.
მეორე დილით კი უფლის პატიოსან ჯვარს ქალაქის ქუჩებში გამოაბრძანებდნენ და დაახლოებით ორი კვირის განმავლობაში სხვადასხვა უბანში დაატარებდნენ. მორწმუნეები ჯვრის წინაშე ლოცულობდნენ, ქალაქის საკურთხებლად და სნეულებათა თავიდან ასაცილებლად კი უფლის მადლსა და შეწევნას ითხოვდნენ.
უფლის პატიოსანი ჯვრის შემოყვანების დღესასწაული, არსებული ცნობებით, IX საუკუნეში უნდა დაწესებულიყო.
თავდაპირველად იგი ადგილობრივი მნიშვნელობის დღესასწაული იყო, ხოლო XII-XIII საუკუნეებიდან, იერუსალიმის ტიპიკონის გავრცელებასთან ერთად, საყოველთაო საეკლესიო დღესასწაულად დამკვიდრდა.
ამ დღეს მორწმუნეები განსაკუთრებული მოწიწებით მოიხსენიებენ მაცხოვრის ჯვარს — ქრისტიანული სარწმუნოების ერთ-ერთ უმთავრეს სიწმინდეს და ადამიანის ცხონების სიმბოლოს.
მართლმადიდებელ ჟურნალისტთა კავშირი ადრე წერდა, კეფალონიაზე „ღვთისმშობლის გველი“ გამოჩნდა.
