საფრანგეთში წმინდა თამარ მეფის სახელობის ტაძარში სიწმინდეები მიაბრძანეს
საქართველოში ქრისტიანობის სახელმწიფო რელიგიად გამოცხადების 1700 წლის იუბილესთან დაკავშირებით ტაძარში საზეიმო ღონისძიება და ერთობლივი ღვთისმსახურება გაიმართა.
საფრანგეთში მდებარე წმინდა თამარ მეფის სახელობის ტაძარში განსაკუთრებული სულიერი მნიშვნელობის დღე აღინიშნა. ტაძარს სტუმრობდა ღვთისმშობლის საქართველოს წილხვდომილობის ხატი და წმინდა ბერი გაბრიელ სალოსის წმინდა ნაწილები, რომელთა წინაშეც მრევლს ლოცვისა და თაყვანისცემის შესაძლებლობა მიეცა.
სიწმინდეების ჩამობრძანება საქართველოში ქრისტიანობის სახელმწიფო რელიგიად გამოცხადების 1700 წლის იუბილესთან დაკავშირებული ღონისძიებების ფარგლებში განხორციელდა და მრევლისთვის დიდი სიხარულისა და სულიერი გაძლიერების მიზეზი გახდა.
ტაძრის წარმომადგენლებმა განსაკუთრებული მადლიერება გამოხატეს სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტის, უწმინდესისა და უნეტარესის შიო III-ის, ასევე დასავლეთ ევროპის მიტროპოლიტ აბრაამის მიმართ, რომელთა მხარდაჭერითაც აღნიშნული მნიშვნელოვანი მოვლენა განხორციელდა.
მადლობა გამოითქვა დეკანოზ კახაბერ გოგოტიშვილისა და დეკანოზ შალვა ჯაჯანიძის მიმართაც, რომლებმაც სიწმინდეების ჩამობრძანებასა და ერთობლივი ღვთისმსახურების აღსრულებაში მიიღეს მონაწილეობა.
ღონისძიების მონაწილეებმა ილოცეს საქართველოს, ქართველი ემიგრანტებისა და სრულიად მართლმადიდებელი სამყაროსთვის, ხოლო ტაძრის წარმომადგენლებმა მადლობა გადაუხადეს ყველას, ვინც ამ მადლიანი დღის ორგანიზებაში საკუთარი წვლილი შეიტანა.
