ეპისკოპოსი გიორგი დიუშენის კუნთოვანი დისტროფიის მქონე ბავშვების მხარდასაჭერად საზოგადოებას მოუწოდებს
მღვდელმთავარი მოქალაქეებსა და ბიზნესსექტორს მოუწოდებს, დროულად ჩაერთონ დახმარების ინიციატივაში და მხარდაჭერა გამოხატონ ბავშვებისა და მათი ოჯახების მიმართ.
ეპისკოპოსი გიორგი (ჯამდელიანი) საზოგადოების თვითორგანიზებული ჯგუფის ინიციატივას გამოეხმაურა, რომელიც დიუშენის კუნთოვანი დისტროფიის მქონე ბავშვების დახმარებას ისახავს მიზნად და მოქალაქეებს აქტიური ჩართულობისკენ მოუწოდა.
მღვდელმთავარმა საკუთარ მიმართვაში განსაკუთრებული ყურადღება გაამახვილა ბავშვების მნიშვნელობასა და მათ მიმართ ქრისტიანულ დამოკიდებულებაზე. მისი თქმით, უფალი იესო ქრისტე ამქვეყნიური ცხოვრების დროს განსაკუთრებული სიყვარულით ეპყრობოდა ბავშვებს, აკურთხებდა და ზრუნავდა მათზე.
ეპისკოპოსმა აღნიშნა, რომ საზოგადოების თითოეული წევრის თანამონაწილეობა მნიშვნელოვანია და მიმართა როგორც კერძო პირებს, ისე ბიზნესსექტორის წარმომადგენლებს:
„უმორჩილესად ვთხოვ საზოგადოების ყველა წევრს, იქნებიან ესენი ბიზნესის თუ კერძო სექტორის წარმომადგენლები, ვისაც ღვთის შემწეობით გააჩნია ფინანსური რესურსი, ჩავერთოთ ამ მოძრაობაში. ბიზნესის სექტორს ასევე თავად შეუძლია დააორგანიზოს მსგავსი მარათონი. მოგეხსენებათ, დრო გადამწყვეტი ფაქტორია“, — აღნიშნავს მღვდელმთავარი.
მისივე განცხადებით, ასეთი მხარდაჭერა არა მხოლოდ საჭიროების მქონე ბავშვების დახმარებაა, არამედ სიკეთის ქმნისა და სულიერი თანადგომის გამოხატულებაც.
დახმარების მსურველთათვის გამოქვეყნებულია საბანკო ანგარიშებიც:
თიბისი ბანკი:
GE20TB7881145068100026
საქართველოს ბანკი:
GE49BG0000000611756133
მართლმადიდებელ ჟურნალისტთა კავშირი წერდა, პატრიარქი შიო III დიუშენის სინდრომით დაავადებული ბავშვების მშობლებს შეხვდა.
