22 მაისს საქართველოს მართლმადიდებელი სამოციქულო ეკლესია წმინდა ღირს შიო მღვიმელს იხსენებს
ცამეტ ასურელ მამათაგანი, შიო მღვიმელი საქართველოში მონაზვნური ცხოვრების ერთ-ერთ უმნიშვნელოვანეს ფუძემდებლად მიიჩნევა — მისი სახელთან არის დაკავშირებული შიომღვიმის მონასტრის დაარსება.
22 მაისს საქართველოს მართლმადიდებელი სამოციქულო ეკლესია წმინდა ღირს შიო მღვიმელის ხსენების დღეს აღნიშნავს.
წმინდა შიო მღვიმელი ცამეტ ასურელ მამათაგანი იყო და ანტიოქიაში, ღვთისმოსავ ოჯახში დაიბადა. მშობლებმა მას კარგი განათლება მისცეს, თუმცა ახალგაზრდობიდანვე განსაკუთრებით იზიდავდა საღმრთო წერილის კითხვა და სულიერი ცხოვრება.
ოცი წლის ასაკში მან გაიგო უდაბნოში მოღვაწე წმინდა იოანე ზედაზნელის შესახებ და მის სანახავად გაემართა. გადმოცემის მიხედვით, წმინდა იოანემ შიო განსაკუთრებული სიყვარულით მიიღო და იწინასწარმეტყველა, რომ იგი მრავალ მონაზონს გაუძღვებოდა. მოგვიანებით შიომ მონაზვნური ცხოვრება აირჩია და მრავალი წელი უდაბნოში მოღვაწეობდა.
შემდგომ წმინდა იოანე ზედაზნელთან და სხვა მოწაფეებთან ერთად საქართველოში ჩამოვიდა ქრისტიანული სარწმუნოების განსამტკიცებლად. კათოლიკოსის კურთხევით ასურელი მამები საქართველოს სხვადასხვა კუთხეში გაემართნენ.
დაყუდებული ცხოვრების სიყვარულით წმინდა შიო მცხეთის მახლობლად, სარკინეთის კლდოვან ადგილას დასახლდა, სადაც მღვიმე იპოვა და იქ დაიწყო მკაცრი სამონასტრო ცხოვრება. საეკლესიო გადმოცემით, მიუხედავად მრავალი განსაცდელისა, მან რწმენითა და ლოცვით ყველაფერი დაითმინა. მის მოღვაწეობას მრავალი ადამიანი შეუერთდა და სწორედ ამ ადგილას ჩაეყარა საფუძველი შიომღვიმის მონასტერს.
გადმოცემით, წმინდა შიოს ცხოვრებას მრავალი სასწაული ახლდა. მის სანახავად და კურთხევის მისაღებად მონასტერში უამრავი მორწმუნე მიდიოდა, ხოლო დროთა განმავლობაში იქ მოღვაწე ძმათა რაოდენობამ ორ ათასს მიაღწია.
სიცოცხლის ბოლოს წმინდა შიო განმარტოვდა მისივე გათხრილ მღვიმეში, სადაც მრავალი წელი ლოცვასა და მარხვაში გაატარა. უფლის მიერ აღსასრულის გამოცხადების შემდეგ მიიღო წმიდა ზიარება და მშვიდობით მიაბარა სული ღმერთს.
დღეს შიომღვიმის მონასტერი საქართველოს ერთ-ერთ მნიშვნელოვან სულიერ ცენტრს წარმოადგენს და ღირსი შიო მღვიმელის ხსენების დღეს მრავალი მორწმუნე განსაკუთრებული ლოცვით აღნიშნავს.
მართლმადიდებელ ჟურნალისტთა კავშირი წერდა, ქართველმა მეცნიერებმა ქრისტიანობის სახელმწიფო რელიგიად გამოცხადების თარიღი ასტრონომიული მონაცემებით დააზუსტეს.
