მიტროპოლიტმა ისაიამ წმინდა სინოდზე თავისი კანდიდატურა წამოაყენა
ნიქოზისა და ცხინვალის მიტროპოლიტმა საკუთარი კანდიდატურის დაყენება მოითხოვა, თუმცა სინოდმა მხარი არ დაუჭირა.
საქართველოს მართლმადიდებელი ეკლესიის წმინდა სინოდის სხდომაზე ნიქოზისა და ცხინვალის მიტროპოლიტმა ისაიამ პატრიარქობის კანდიდატად საკუთარი თავის დასახელების სურვილი გამოთქვა, თუმცა სინოდმა მის ინიციატივას მხარი არ დაუჭირა.
საქართველოს საპატრიარქოს მიერ გავრცელებული მიმართვის მიხედვით, მიტროპოლიტი ისაია აღნიშნავდა, რომ საპატრიარქო კანდიდატისთვის მოთხოვნილი საღვთისმეტყველო განათლების კრიტერიუმი მხოლოდ ფორმალურად არ უნდა განხილულიყო. მისი თქმით, ეპისკოპოსად კურთხევა თავისთავად ადასტურებს მღვდელმთავრის მზადყოფნას ეკლესიის მსახურებისთვის და აძლევს მას უფლებას, მონაწილეობა მიიღოს საპატრიარქო არჩევნებში.
მიმართვაში ისაია ასევე უსვამდა ხაზს, რომ მრავალწლიანი საეკლესიო მსახურება და ეპარქიის მართვის გამოცდილება არანაკლებ მნიშვნელოვანია, ვიდრე აკადემიური განათლება. მისივე განცხადებით, ყოველი მღვდელმთავარი უფლებამოსილია დაეყენებინა საკუთარი კანდიდატურა, ხოლო ამ უფლების შეზღუდვა ეპისკოპოსის ხარისხის მნიშვნელობას ამცირებდა.
„მსურდა დამეცვა ის პრინციპი, რომ მღვდელმთავრის მსახურების ნაყოფი და ეკლესიისადმი ერთგულება მისი კომპეტენციის მთავარი საზომია,“ – ეწერა მიტროპოლიტ ისაიას სინოდისთვის მიმართვაში.
გუშინდელ სხდომაზე წმინდა სინოდმა საბოლოოდ სამი საპატრიარქო კანდიდატი გამოარჩია: მოსაყდრე, სენაკისა და ცხოროწყუს მიტროპოლიტი შიო (მუჯირი), ფოთისა და ხობის მიტროპოლიტი გრიგოლი (ბერბიჭაშვილი) და მროველ-ურბნელის მიტროპოლიტი იობი (აქიაშვილი).
მართლმადიდებელ ჟურნალისტთა კავშირი წერდა, წმინდა სინოდის სხდომას მიტროპოლიტი ზოსიმე არ ესწრება.
