ზუგდიდისა და ცაიშის ეპარქიაში საკვირაო სკოლის საგანმანათლებლო მისია
ლიის წმინდა გიორგის ტაძართან არსებული სკოლა ახალგაზრდებს სულიერი, კულტურული და შემოქმედებითი განვითარების გზას სთავაზობს.
ზუგდიდისა და ცაიშის ეპარქიის ახალგაზრდობის, განათლებისა და კულტურის ცენტრთან არსებული ლიის წმინდა გიორგის ტაძრის საკვირაო სკოლა წარმოადგენს მნიშვნელოვან საგანმანათლებლო სივრცეს, რომელიც ემსახურება როგორც ფორმალურ, ისე არაფორმალურ განათლებას. მისი საქმიანობა მიზნად ისახავს ახალგაზრდა თაობაში ეროვნული თვითშეგნების გაღრმავებას, სულიერი და კულტურული ღირებულებების გაცნობას და ინტელექტუალური განვითარების ხელშეწყობას.
სწავლება ეფუძნება ქართულ ტრადიციებსა და მართლმადიდებლურ ღირებულებებს, რაც მოსწავლეებს აძლევს შესაძლებლობას, უკეთ გაიცნონ საკუთარი იდენტობა და მემკვიდრეობა. სასწავლო პროგრამა მრავალფეროვანია და მოიცავს ისეთ დისციპლინებს, როგორიცაა საეკლესიო ტრადიციული გალობა, ქართული ფოლკლორი, ხატწერა, სახვითი ხელოვნება, მედავითნეობა, ასევე ქართული ენა და ლიტერატურა.
საკვირაო სკოლის მთავარი მიზნებია მოსწავლეებში სულიერი და ზნეობრივი ღირებულებების განვითარება, ქართული კულტურისა და ტრადიციების გაცნობა, შემოქმედებითი უნარების ჩამოყალიბება და ეკლესიურ ცხოვრებაში მათი აქტიური ჩართულობის ხელშეწყობა.
სასწავლო პროცესი აგებულია პრაქტიკულ და შემოქმედებით აქტივობებზე. მოსწავლეები სწავლობენ საგალობლების შესრულებას, ეცნობიან ფოლკლორულ ნიმუშებს, ქმნიან ხატებსა და ნახატებს, კითხულობენ და აანალიზებენ ტექსტებს, მათ შორის ლიტერატურულ ნაწარმოებებსა და ფსალმუნებს. ასევე მნიშვნელოვანი ადგილი ეთმობა ჯგუფურ მუშაობასა და დისკუსიებს, რაც ხელს უწყობს მათ კრიტიკული და ანალიტიკური აზროვნების განვითარებას.
სწავლის შედეგად მოსწავლეები იძენენ საწყის ცოდნას ქართულ კულტურასა და ტრადიციებზე, სწავლობენ მარტივი საგალობლების შესრულებას, ავლენენ შემოქმედებით უნარებს და ივითარებენ ტექსტის გააზრების უნარს. ამასთანავე, მათში ყალიბდება სულიერი და ზნეობრივი ღირებულებები, რაც მნიშვნელოვან საფუძველს ქმნის მათი პიროვნული განვითარებისათვის.
გაკვეთილები ტარდება წინასწარ განსაზღვრული სტრუქტურის მიხედვით, რომელიც მოიცავს თემის განსაზღვრას, მიზნის დასახვას, შესავალს, ძირითად ნაწილს, შეჯამებასა და შეფასებას. საჭიროების შემთხვევაში მოსწავლეებს ეძლევათ მცირე დავალებებიც, რაც მიღებული ცოდნის განმტკიცებას ემსახურება.
ზუგდიდისა და ცაიშის ეპარქიის საკვირაო სკოლა დღეს წარმოადგენს მნიშვნელოვან საგანმანათლებლო და სულიერ ცენტრს, სადაც ახალგაზრდებს ეძლევათ შესაძლებლობა, შეითვისონ ცოდნა, განივითარონ უნარები და გაიზარდონ ეროვნულ და ქრისტიანულ ღირებულებებზე დაფუძნებული გარემოში.
მართლმადიდებელ ჟურნალისტთა კავშირი წერდა, 23 აპრილი ივანე ჯავახიშვილის დაბადების დღეა.
