პატრიარქი თეოფილე III: „საქართველომ თავისი სარწმუნოება მიიტანა იერუსალიმში“

იერუსალიმისა და სრულიად პალესტინის პატრიარქი თეოფილე III

იერუსალიმისა და სრულიად პალესტინის პატრიარქმა თეოფილე III-მ საქართველოში ქრისტიანობის სახელმწიფო რელიგიად გამოცხადების 1700 წლისთავთან დაკავშირებით მილოცვა გაავრცელა. 2026 წლის 14 ოქტომბრით დათარიღებულ მიმართვაში, სახელწოდებით „ქრისტიანობის 1700 წელი საქართველოში: მცხეთიდან წმინდა ქალაქ იერუსალიმისაკენ“, მისმა უნეტარესობამ საქართველოს ქრისტიანულ მემკვიდრეობაზე, წმინდა მიწაზე ქართველთა მოღვაწეობასა და მომავალი თაობებისთვის სარწმუნოების გადაცემის მნიშვნელობაზე ისაუბრა.

პატრიარქმა აღნიშნა, რომ საიუბილეო თარიღი მხოლოდ ისტორიული წარსულის გახსენებას არ გულისხმობდა და, უპირველეს ყოვლისა, ღვთისადმი მადლიერებისა და სულიერი კავშირის განახლების შესაძლებლობას წარმოადგენდა.

„ამრიგად, დღეს, როდესაც საქართველოს გაქრისტიანებიდან 1700 წლის იუბილეს ვზეიმობთ, მზერას უბრალოდ დიდებული წარსულისაკენ კი არ მივაპყრობთ, არამედ ცოცხალ სულიერ კავშირს განვაახლებთ“, — განაცხადა თეოფილე III-მ.

მისმა უნეტარესობამ წმინდა მოციქულთასწორი ნინოს სამოციქულო მოღვაწეობა და მეფე მირიანის დროს ძველი იბერიის მიერ ქრისტიანობის მიღება გაიხსენა. მისი განმარტებით, ამ მოვლენამ საფუძველი ჩაუყარა სულიერ ტრადიციას, რომელმაც ქართველი ხალხის ისტორია, კულტურა, ენა და ეროვნული თვითშეგნება განმსჭვალა.

მილოცვაში განსაკუთრებული ყურადღება დაეთმო საქართველოსა და იერუსალიმის ისტორიულ ურთიერთობას. პატრიარქმა აღნიშნა, რომ ქართველთა კავშირი წმინდა ქალაქთან მხოლოდ მომლოცველობით არ შემოიფარგლებოდა: ქართველი მონაზვნები და სასულიერო პირები წმინდა მიწაზე რჩებოდნენ, მონასტრებში მოღვაწეობდნენ, წერდნენ და თარგმნიდნენ წმინდა ტექსტებს და იერუსალიმის ეკლესიის ცოცხალი ტრადიციის ნაწილად იქცეოდნენ.

„საბოლოო ჯამში, ქართველები იერუსალიმში მხოლოდ უბრალო მომლოცველებად არ ჩამოდიოდნენ. ისინი წმინდა ქალაქის ისტორიის ნაწილად იქცნენ!“ — აღნიშნა იერუსალიმის პატრიარქმა.

თეოფილე III-მ ამ მრავალსაუკუნოვან ურთიერთობაში პატიოსანი ჯვრის მონასტრის განსაკუთრებული ადგილი გამოყო. მან მონასტერი, რომელიც ქართულ სამონასტრო ტრადიციასა და ღირსი პროხორე იბერის სახელს დაუკავშირა, ლოცვის, ასკეტური მოღვაწეობის, განათლებისა და სულიერი შემოქმედების მნიშვნელოვან ცენტრად წარმოაჩინა.

პატრიარქის თქმით, წმინდა მიწასთან ურთიერთობამ საქართველოს საეკლესიო ცხოვრებაშიც პოვა გამოხატულება. მან ყურადღება გაამახვილა ქართულ ტრადიციაში დამკვიდრებულ სახელებზე — სიონი, ბეთანია, ბეთლემი, თაბორი და გეთსიმანია — როგორც წმინდა მიწასთან სულიერი სიახლოვის ნიშნებზე.

„სანამ საქართველო იერუსალიმისაკენ მიემართებოდა, იერუსალიმი სულიერად შემოვიდა საქართველოში!“ — განაცხადა მისმა უნეტარესობამ და დასძინა: „საქართველომ თავისი სარწმუნოება მიიტანა იერუსალიმში და იერუსალიმმა საქართველოს სულიერი მეხსიერება აღბეჭდა“.

მიმართვაში პატრიარქმა საეკლესიო ერთობის მნიშვნელობაზეც ისაუბრა. მან აღნიშნა, რომ მართლმადიდებელი ხალხების განსხვავებული ენები და ტრადიციები საერთო სარწმუნოებაში ერთიანდებოდა.

„იერუსალიმი გვახსენებს, რომ ეკლესია არ არის ეროვნული ისტორიების ერთობლიობა, არამედ ქრისტეს ერთი სხეულია“, — აღნიშნა თეოფილე III-მ.

მისმა უნეტარესობამ ხაზი გაუსვა, რომ ჩვიდმეტსაუკუნოვანი ქრისტიანული მემკვიდრეობა მომავლის წინაშე პასუხისმგებლობასაც გულისხმობდა. მისი თქმით, წინაპართა პატივისცემა მათი საქმეების გახსენებასთან ერთად სარწმუნოების დაცვას, საეკლესიო ერთობის განმტკიცებასა და ახალი თაობებისთვის სახარების ცოცხალი გამოცდილების გადაცემას მოითხოვდა.

„ეს მემკვიდრეობა მხოლოდ წარსულს არ ეკუთვნის. იგი მოწოდება და პასუხისმგებლობაა მომავლისთვის“, — განაცხადა იერუსალიმის პატრიარქმა.

მილოცვის დასასრულს თეოფილე III-მ უფალს ქართველი ხალხის დაცვა, მამაპაპისეულ მართლმადიდებელ სარწმუნოებაში განმტკიცება და წმინდა ქალაქ იერუსალიმთან მისი სულიერი კავშირის შენარჩუნება შესთხოვა.

„დაე, გოლგოთაზე ჯვარცმულმა და ყოვლადწმინდა და სიცოცხლის მიმნიჭებელი საფლავიდან აღმდგარმა უფალმა დაიცვას ღვთისმოყვარე ქართველი ხალხი, განამტკიცოს იგი მამაპაპისეულ მართლმადიდებელ სარწმუნოებაში და ცოცხლად და ნაყოფიერად შეინარჩუნოს მისი წმინდა კავშირი წმინდა ქალაქ იერუსალიმთან“, — ნათქვამი იყო პატრიარქის მილოცვაში.

მართლმადიდებელ ჟურნალისტთა კავშირი წერდა, პატრიარქი თეოფილე: იერუსალიმის ეკლესია განსაცდელების პერიოდს გადის.

წაიკითხეთ ასევე