მიტროპოლიტმა იოანემ წმინდა კვიპრიანესა და იუსტინას ტაძარში პარაკლისი აღასრულა
იოანე – ქუთათელ-გაენათელი მიტროპოლიტი. ფოტო: ეპარქიის გვერდი
15 ოქტომბერს, წმინდა დიდმოწამეთა დავით და კონსტანტინე მხეიძეების, წმინდა მღვდელმოწამე კვიპრიანესა და ქალწულმოწამე იუსტინას ხსენების დღეს, ქუთათელ-გაენათელმა მიტროპოლიტმა იოანემ წმინდა კვიპრიანესა და იუსტინას სახელობის ტაძარში სამშვიდობო პარაკლისი აღასრულა.
ამ დღეს მოხსენიებული წმინდა დავით და კონსტანტინე მხეიძეები არგვეთის მთავრები იყვნენ. ისინი გამოირჩეოდნენ ქრისტიანული სარწმუნოების ერთგულებით, ძველი და ახალი აღთქმის ცოდნითა და მხედრული სიმამაცით. მურვან-ყრუს შემოსევისას ძმებმა უფალს შემწეობა შესთხოვეს, სამშობლოს დასაცავად ლაშქარი შეკრიბეს, მოსახლეობას კი გაძლიერებული ლოცვისა და ღამისთევისკენ მოუწოდეს.
თავდაპირველად ქართველებმა მტრის დამარცხება შეძლეს, თუმცა შემდგომ მრავალრიცხოვან ლაშქართან უთანასწორო ბრძოლაში დავით და კონსტანტინე ტყვედ ჩავარდნენ. მურვან-ყრუ მათ ქრისტიანული სარწმუნოების უარყოფას აიძულებდა და სანაცვლოდ პატივსა და მაღალ თანამდებობას ჰპირდებოდა. ძმებმა შეთავაზება უარყვეს და ქრისტესადმი ერთგულება უშიშრად დაამოწმეს.
წმინდანთა ცხოვრების მიხედვით, დავითმა მტარვალს უპასუხა: „ნუ უყოფინ ჩუენდა, რაჲთა დაუტეოთ ნათელი და შეუდგეთ ბნელსა“. კონსტანტინემაც ძმის მსგავსად აღიარა წმინდა სამება და განაცხადა, რომ იმავე სარწმუნოებისთვის მზად იყო, სიცოცხლე დაეთმო.
მრავალდღიანი შიმშილის, წყურვილისა და სასტიკი წამების მიუხედავად, ძმებს ქრისტე არ უარუყვიათ. საბოლოოდ, მათ ხელ-ფეხი შეუკრეს, ქედზე ლოდები გამოაბეს და მდინარეში გადააგდეს. აღსასრულის წინ მოწამეებმა უფალს შესთხოვეს, მათი სხეულები უხრწნელად დაეცვა და შეწეოდა მათ, ვინც მათი მეოხებით მის წმინდა სახელს მოუხმობდა.
ჰაგიოგრაფიული გადმოცემით, ღამით მოწამეთა სხეულებს ლოდები მოსცილდა და ისინი წყლის ზედაპირზე ამოტივტივდა. მსახურებმა წმინდანთა ცხედრები გამოასვენეს და წყალწითელას ხეობაში, მურვან-ყრუს მიერ დანგრეული ხარების ეკლესიის მახლობლად მდებარე აკლდამაში დაასვენეს. ძმების განსასვენებელსა და მის შემოგარენს მოწამეთა ეწოდა.
წმინდა დავით და კონსტანტინე მხეიძეების მოწამებრივი ღვაწლი საქართველოს ეკლესიის ისტორიაში სარწმუნოების ერთგულებისა და სამშობლოსთვის თავგანწირვის გამორჩეულ მაგალითად დარჩა. მათი ხსენების დღეს მორწმუნეები პატივს მიაგებენ ძმების თავდადებას და ლოცვით ითხოვენ მათ მეოხებას.
მართლმადიდებელ ჟურნალისტთა კავშირი წერდა, ქუთათელ-გაენათელმა მიტროპოლიტმა იოანემ ეპარქიის სასულიერო პირები დააჯილდოვა.
წაიკითხეთ ასევე
ფილადელფიაში სვეტიცხოვლობა საზეიმო ღვთისმსახურებით აღინიშნა
საღმრთო ლიტურგია ჩრდილოეთ ამერიკის ეპისკოპოსმა საბამ აღავლინა — მრევლს ღვთისმშობლის წილხვდომილობის ხატისა და წმინდა გაბრიელ ბერის წმინდა ნაწილების მოლოცვის შესაძლებლობა მიეცა.
საქართველოს საპატრიარქო განცხადებას ავრცელებს
საქართველოს საპატრიარქო 14 ოქტომბერს სამთავროს მონასტერში აღვლენილ ღვთისმსახურებასთან დაკავშირებით გავრცელებულ ინფორმაციას გამოეხმაურა და საეკლესიო თანამსახურების წესზე განმარტება გაავრცელა.
გამოიცა წმინდა მაქსიმე აღმსარებლის შრომათა მეორე ტომი
გამოცემაში ეპისტოლეთა სრული კორპუსი და „ამბიგვები თომასადმი“ პირველი ნაწილი შევიდა — თხზულებები ბერძნულიდან თეოლოგმა ედიშერ ჭელიძემ თარგმნა.
მიტროპოლიტ დიმიტრის ინიციატივით, სნოს ხეობაში 100 ფრთა კაკაბი გაუშვეს
გარემოსდაცვითი პროექტი ადგილობრივი ეკოსისტემის შენარჩუნებისა და განვითარების მიზნით, საეკლესიო და სახელმწიფო უწყებების თანამშრომლობით განხორციელდა.
მარგვეთისა და უბისის ეპარქიას მართლმადიდებელი ეკლესიების წარმომადგენლები ეწვივნენ
საქართველოში ქრისტიანობის სახელმწიფო რელიგიად გამოცხადების 1700 წლისთავთან დაკავშირებით ჩამობრძანებულმა მღვდელმთავრებმა ეპარქიის ტაძრები და მონასტერი მოილოცეს.
მღვდელმოწამე დიონისე არეოპაგელი - ათენელი ეპისკოპოსი
ჩვენამდე მოაღწია დიონისე არეოპაგელის თხზულებებმა, რომელთაც განუზომელი მნიშვნელობა აქვთ მართლმადიდებლური ეკლესიის ღვთისმეტყველებისათვის.