ეპისკოპოსი გიორგი: „ჩვენი ინტერესია კულტურული მემკვიდრეობის დაცვა“

მარნეულისა და ჰუჯაბის ეპისკოპოსი გიორგი. ფოტო: Marneuli Hujabi

მარნეულისა და ჰუჯაბის ეპისკოპოსი გიორგი აზერბაიჯანის საგარეო საქმეთა სამინისტროს განცხადებას გამოეხმაურა, რომელმაც საზოგადოებაში შეშფოთება გამოიწვია.

ეპისკოპოსის განცხადებით, საქართველოს მართლმადიდებელი ეკლესია პატივს სცემს აზერბაიჯანის ტერიტორიულ მთლიანობასა და სუვერენიტეტს და ქურმუხის ტაძართან დაკავშირებით რაიმე ტერიტორიული პრეტენზია არ დაუყენებია.

„ჩვენთვის ქურმუხის ტაძარს აქვს ისტორიული, საეკლესიო და კულტურული მემკვიდრეობის მნიშვნელობა“, – განაცხადა მარნეულისა და ჰუჯაბის ეპისკოპოსმა.

მისივე თქმით, საქართველოს ეკლესიის ინტერესს არ წარმოადგენს ორ მეზობელ და მეგობარ სახელმწიფოს შორის დაპირისპირება, არამედ ქურმუხის ტაძრის ისტორიული სახის, სიწმინდისა და კულტურული მემკვიდრეობის სათანადოდ დაცვა.

ეპისკოპოსმა გიორგი აღნიშნა, რომ მსგავსი მგრძნობიარე საკითხები მხარეებს შორის კეთილმეზობლობისა და ურთიერთპატივისცემის საფუძველზე უნდა განიხილებოდეს და წყდებოდეს.

„ეს არის პირადად ჩემი მოკრძალებული რეკომენდაცია“, – აღნიშნა მან.

მარნეულისა და ჰუჯაბის ეპისკოპოსმა განცხადება ბიბლიური სიტყვებით დაასრულა:

„უფალმან ძალი ერსა თვისსა მოსცეს, უფალმან აკურთხოს ერი თვისი მშვიდობით“.

მართლმადიდებელ ჟურნალისტთა კავშირმა დაწერა, ეპისკოპოსი გიორგი ხელისუფლებას მიმართავს: „ნუ ჩაერევით საპატრიარქო არჩევნებში“.

წაიკითხეთ ასევე