ეპისკოპოსი გიორგი ხელისუფლებას მიმართავს: „ნუ ჩაერევით საპატრიარქო არჩევნებში“

გიორგი,ეპისკოპოსი მარნეულისა და ჰუჯაბის. ფოტო: ეპარქიის გვერდი

მარნეულისა და ჰუჯაბის ეპისკოპოსი გიორგი ხელისუფლებას საჯარო მიმართვით მოუწოდებს, არ ჩაერიოს საპატრიარქო არჩევნების პროცესში და უზრუნველყოს მხოლოდ უსაფრთხო გარემო მომავალი გაფართოებული საეკლესიო კრებისთვის.

ეპისკოპოსი საკუთარ განცხადებაში პირველ პირში საუბრობს და აღნიშნავს:
„მინდა მივმართო ხელისუფლებას და ვთხოვო — ნუ ჩაერევით საპატრიარქო არჩევნებში ნურავის სასარგებლოდ. პირიქით, დაიცავით მომავალი გაფართოებული საეკლესიო კრების უსაფრთხოება, რათა შევძლოთ მშვიდობიან გარემოში შეკრება და ღვთის შემწეობით არჩევანის გაკეთება.“

მისივე თქმით, ბუნებრივია, რომ ადამიანებს, მათ შორის ხელისუფლების წარმომადგენლებსაც, შეიძლება ჰქონდეთ პირადი სიმპათიები კონკრეტული კანდიდატების მიმართ, თუმცა ეს არ უნდა იქცეს პროცესში ჩარევის საფუძვლად:
„შესაძლოა ნებისმიერ ადამიანს, მათ შორის ხელისუფლების წარმომადგენლებსაც, გააჩნდეთ ერთგვარი სიმპათია რომელიმე კანდიდატის მიმართ — ეს სრულიად ნორმალურია, რადგან ისინიც ჩვენი ეკლესიის შვილები არიან. თუმცა ყოვლად დაუშვებელია, ირიბადაც კი, ამ პროცესებში ჩარევა.“

ეპისკოპოსი გიორგი საკუთარ პოზიციას ეკლესიის კანონიკური საფუძვლებით ამყარებს და ციტირებს მოციქულთა 30-ე კანონს:
„ეპისკოპოსი, რომელიც საერო მთავრებს დაიხმარებს და მათი შემწეობით მიიღებს ძალაუფლებას, განკვეთილ და განყენებულ იქნეს; ასევე ყველა მისი თანამზრახველი.“

მისი განმარტებით, ეკლესიის ტრადიციით, პატრიარქისა და ეპისკოპოსების არჩევის უფლება ყოველთვის ეკუთვნოდა ეპისკოპოსთა კრებას, რასაც მეშვიდე მსოფლიო კრების მესამე კანონიც ადასტურებს. ეპისკოპოსი ხაზს უსვამს, რომ ეკლესია ყოველთვის გმობდა სახელმწიფოს უკანონო ჩარევას სასულიერო იერარქიის ფორმირების პროცესში.

„ასეთი ჩარევა ეკლესიის კანონებით სიმონიასთან არის გათანაბრებული,“ — აღნიშნავს ეპისკოპოსი გიორგი და განმარტავს, რომ მსგავსი ქმედება ითვალისწინებს უმკაცრეს სასჯელს — როგორც ხარისხიდან განკვეთას, ისე ეკლესიიდან მოკვეთას. მისი თქმით, ეს არის ერთ-ერთი გამონაკლისი შემთხვევა, როდესაც კანონი ერთდროულად ორ სასჯელს აწესებს, რადგან სიმონია ეკლესიისთვის განსაკუთრებულად მძიმე დანაშაულად მიიჩნევა.

მიმართვაში განსაკუთრებული ყურადღება ეთმობა იმ პასუხისმგებლობას, რომელიც მომავალ პატრიარქის არჩევას ახლავს:
„ყოველ მღვდელმთავარს არჩევნების შემდეგ უნდა ჰქონდეს განცდა, რომ ეს არის სულიწმინდით გამორჩეული პატრიარქი, რომლის კანონიკური მორჩილების ვალდებულებაც ექნება და არა ‘დანიშნული’ პატრიარქი. წინააღმდეგ შემთხვევაში, ეკლესია შეიძლება დადგეს დიდი განსაცდელის წინაშე და მივიდეს კიდეც განხეთქილებამდე — რისგანაც დაგვიფაროს უფალმა.“

განცხადების დასასრულს, ეპისკოპოსი გიორგი ლოცვით მიმართავს ღმერთს და ერთობისკენ მოუწოდებს საზოგადოებას:
„მკვდრეთით აღდგომილმა და ჯოჯოხეთის ბჭეთა შემმუსვრელმა ქრისტე მაცხოვარმა მოგვცეს კეთილგონიერება, რათა ჩვენს შორის მუდამ სუფევდეს თანხმობა და ქრისტესმიერი ერთსულოვნება. ამინ!“

მართლმადიდებელ ჟურნალისტთა კავშირმა დაწერა, აბბა ალავერდელი მიტროპოლიტი დავით მახარაძე: „პატრიარქის წერილი ანდერძი არ არის“.

წაიკითხეთ ასევე