ბულგარეთის პატრიარქი ილია II-ზე: „ჩვენ გავაცილეთ ადამიანი, რომლის მსახურებაც უდიდესი კურთხევა იყო საქართველოსთვის“

ბულგარეთის მიტროპოლიტი დანიელი სამების საკათედრო ტაძარში. ფოტო: მჟკ

ბულგარეთის პატრიარქმა საქართველოს კათოლიკოს-პატრიარქ ილია II-ის შესახებ ისაუბრა და აღნიშნა, რომ ქვეყანამ „ღვთის ადამიანი“ გააცილა უკანასკნელ მიწიერ გზაზე.

მისი თქმით, ილია II-ის 49-წლიანი პატრიარქობა იშვიათი მოვლენაა და ეს მიუთითებს იმ განსაკუთრებულ კურთხევაზე, რომელიც მას ჰქონდა მინიჭებული. პატრიარქმა ასევე ყურადღება გაამახვილა იმ დიდ სიყვარულსა და მადლიერებაზე, რომელიც საზოგადოებამ გამოავლინა – სიონში შეკრებილი ადამიანების „უსასრულო ნაკადი“ ამის ნათელი დასტური იყო.

ბულგარეთის პატრიარქმა ილია II-ის მოღვაწეობა წმინდა გაბრიელ სალოსის (ურგებაძის) მსახურებასაც დაუკავშირა და აღნიშნა, რომ ორივემ საქმიანობა კომუნისტური რეჟიმის დროს დაიწყო, როდესაც „სულიერი თვალსაზრისით უდაბნო იყო“. მისი შეფასებით, მათი ბრძოლა ეფუძნებოდა რწმენას, პატიოსნებასა და საგანმანათლებლო საქმიანობას, რაც ხალხის კეთილდღეობას ემსახურებოდა.

მისივე თქმით, ბულგარეთის დელეგაციამ სურვილი გამოთქვა, სამთავროს დედათა მონასტერსაც სწვეოდა და პატივი მიეგო წმინდა გაბრიელ ურგებაძისთვის. მან აღნიშნა, რომ მამა გაბრიელის სიწმინდეების ნაწილები ბულგარეთშიც ინახება და იქ დიდ პატივს მიაგებენ.

ბულგარეთის პატრიარქმა დასძინა, რომ ილია II-ისა და წმინდა გაბრიელის ღვაწლი უდიდესია და იმედი გამოთქვა, რომ მათი ლოცვა მომავალშიც შეეწევა ხალხს. მისივე თქმით, სასურველია, საქართველოში რწმენა კიდევ უფრო განმტკიცდეს, ხოლო ბულგარეთის მართლმადიდებელმა ეკლესიამ განაგრძოს მჭიდრო კავშირი საქართველოს ეკლესიასთან.

მართლმადიდებელ ჟურნალისტთა კავშირი წერდა, პატრიარქ ბართლომეოსის სიტყვა, წარმოთქმული საქართველოს პატრიარქის ილია II-ის წესის აგების მსახურებაზე.

წაიკითხეთ ასევე