პატრიარქი დაკრძალვამდე სამების საკათედრო ტაძარში იქნება დასვენებული

ფეხით მსვლელობა საპატრიარქოდან სამების ტაძრამდე. ფოტო: მჟკ

18 მარტს საქართველოს კათოლიკოს-პატრიარქი, მცხეთა-თბილისის მთავარეპისკოპოსი, ბიჭვინთისა და ცხუმ-აფხაზეთის მიტროპოლიტი ილია II საქართველოს საპატრიარქოს შენობიდან სამების საკათედრო ტაძარში გადაასვენეს. უწმინდესის ცხედარი ტაძრამდე ფეხით მსვლელობით, მრავალი მართლმადიდებლის თანხლებით მიასვენეს.

სამების საკათედრო ტაძარში პატრიარქის ცხედარი 22 მარტამდე იქნება დასვენებული, სადაც მოქალაქეებს 24 საათის განმავლობაში შეეძლებათ მისვლა და უწმინდესის ხსოვნისადმი პატივის მიგება.

საქართველოს სამოციქულო ეკლესიის წმინდა სინოდის გადაწყვეტილებით, 22 მარტს ილია II-ს სიონის საპატრიარქო ტაძარში დაკრძალავენ. დაკრძალვის ადგილი მისი ანდერძის შესაბამისად განისაზღვრა.

სინოდის დადგენილებით, 40 დღის განმავლობაში პატრიარქის მოვალეობას შეასრულებს მისი თანამოსაყდრე, სენაკისა და ჩხოროწყუს მიტროპოლიტი მეუფე შიო (მუჯირი). 40 დღის გასვლის შემდეგ კი წმინდა სინოდი კენჭისყრის საფუძველზე ახალ საქართველოს კათოლიკოს-პატრიარქს აირჩევს.

მართლმადიდებელ ჟურნალისტთა კავშირი წერდა, მისი უნეტარესი მიტროპოლიტი ტიხონი სამძიმრის წერილს უგზავნის საქართველოს მართლმადიდებელ ეკლესიას.