ევროპაში ქრისტიანების მიმართ სიძულვილით მოტივირებული დანაშაულები გახშირდა

ხანძრის შედეგად დაზიანებული წმინდა მარტინის ეკლესიის (საფრანგეთი) ინტერიერი. ფოტო: fsspx

ევროპაში ქრისტიანების მიმართ სიძულვილით მოტივირებული დანაშაულების რაოდენობა კვლავ იზრდება. ორგანიზაცია „ევროპაში ქრისტიანების მიმართ შეუწყნარებლობისა და დისკრიმინაციის ობსერვატორიის“ ინფორმაციით, მხოლოდ 2026 წლის იანვარში, ერთ თვეში, ევროპის სხვადასხვა ქვეყანაში 39 ინციდენტი დაფიქსირდა, რომელიც მიმართული იყო ეკლესიების, რელიგიური სიმბოლოებისა და ქრისტიანების წინააღმდეგ. 

კვლევის თანახმად, დაფიქსირებული შემთხვევებიდან 18 ვანდალიზმის ფაქტია, 10 კი ეკლესიებში ან რელიგიურ ობიექტებზე ხანძრის გაჩენა. ასევე აღირიცხა რელიგიური სიმბოლიკის წაბილწვის 5 და ქურდობის 4 შემთხვევა. გარდა ამისა, დაფიქსირდა ძალადობის 3 ფაქტი ქრისტიანების მიმართ, მათ შორის ნიდერლანდებში ქუჩაში თავდასხმა მქადაგებელზე.

ინციდენტების ყველაზე დიდი რაოდენობა იტალიაში დაფიქსირდა — 10 შემთხვევა. მას მოსდევს გერმანია 8 ინციდენტით და საფრანგეთი 7 შემთხვევით. ცალკეული ფაქტები დაფიქსირდა ესპანეთში, ავსტრიაში, პოლონეთში, ნიდერლანდებში, პორტუგალიაში, სერბეთსა და რუმინეთში. ევროკავშირის ფარგლებს გარეთ მსგავსი დანაშაულები მოხდა დიდ ბრიტანეთსა და უკრაინაშიც.

კვლევის ავტორები განსაკუთრებულ ყურადღებას ამახვილებენ ეკლესიების გადაწვის შემთხვევებზე. მათი თქმით, მხოლოდ ერთ თვეში დაფიქსირებული 10-ზე მეტი ხანძარი არაბუნებრივად მაღალი მაჩვენებელია. მსგავსი შემთხვევების უმეტესობა გერმანიასა და იტალიაში მოხდა, სადაც დამნაშავეები მიზანმიმართულად ანადგურებდნენ ლიტურგიკულ წიგნებს, საშობაო დეკორაციებსა და საკურთხევლებს.

ორგანიზაციის ინფორმაციით, 2024 წელს ევროპაში ქრისტიანების მიმართ სიძულვილის ნიადაგზე ჩადენილი დანაშაულების რაოდენობამ 2200-ს მიაღწია. ექსპერტების შეფასებით, რეალური მაჩვენებელი გაცილებით მაღალია, რადგან მრავალი ინციდენტი ოფიციალურად არ აღირიცხება და სტატისტიკაში არ ხვდება.

მართლმადიდებელ ჟურნალისტთა კავშირი წერდა, წმინდა საფარველის მონასტრის წინამძღვარი უხუცესი დოსითეოსი ომის შედეგებზე.