მართლმადიდებელი სამოციქულო ეკლესია 17 თებერვალს მოიხსენებს ღირს ევაგრეს

ღირსი ევაგრე. ფოტო: ღია წყარო

მართლმადიდებელი სამოციქულო ეკლესია 17 თებერვალს მოიხსენებს ღირს ევაგრეს, რომელიც მონაზვნად აღკვეცამდე ციხედიდის მთავარი და ქართლის მეფე ფარსმანის ერთ-ერთი უახლოესი მრჩეველი იყო. იგი ღვთისმოსავ ოჯახში დაიბადა და სიყრმიდანვე საღმრთო წერილის შესწავლით იზრდებოდა.

ევაგრეს ცხოვრების გარდამტეხი მომენტი სარკინეთის მთაზე ნადირობისას მოხდა, როდესაც მან ღირსი მამა შიო მღვიმელი იხილა. გადმოცემის თანახმად, ევაგრემ გამოქვაბულში დაყუდებული ბერი მტრედის მსგავსი ფრინველის დახმარებით აღმოაჩინა, რომელიც მას საკვებს მიართმევდა. ღირს მამასთან შეხვედრამ მასში ძლიერი სულიერი მისწრაფება გააღვიძა და გადაწყვიტა, დაეტოვებინა საერო ცხოვრება.

წმიდა შიოს კურთხევით ევაგრე დაბრუნდა სასახლეში, სადაც თავისი ქონება გლახაკებს დაურიგა, ახლობლებს გამოემშვიდობა და საბოლოოდ მონაზვნური ცხოვრების გზას დაადგა. გადმოცემის მიხედვით, მდინარე მტკვარმა ორჯერ გაიპო, რათა ღვთის გზაზე შემდგარი ევაგრე მშვიდობით გადასულიყო.

ევაგრეს მონაზვნური ღვაწლი მალე გახდა ცნობილი. შიო მღვიმის მონასტერში მრავალი ადამიანი მივიდა სულიერი ცხოვრების დასაწყებად. ქართლის მეფე ფარსმანმაც მოინახულა უდაბნო და, ღირსი შიოს სიწმინდის ხილვით აღძრულმა, მონასტერს დიდი შესაწირავი შესწირა.

სიცოცხლის ბოლოს ღირსმა შიო მღვიმელმა მონასტრის წინამძღვრად სწორედ ევაგრე გამოარჩია. მიუხედავად თავმდაბლობისა და საკუთარი უძლურების განცდისა, წმიდა ევაგრემ მორჩილებით მიიღო ეს მსახურება და ღვთის შეწევნით ბრძნულად განაგებდა საძმოს.

წმიდა ევაგრე მშვიდობით აღესრულა. იგი დაკრძალულია შიო მღვიმის მონასტერში. მისი ცხოვრება ეკლესიისთვის რჩება თავმდაბლობის, მორჩილებისა და ღმერთისადმი სრული მიძღვნის ნათელ მაგალითად.

მართლმადიდებელ ჟურნალისტთა კავშირმა დაწერა, 17 თებერვალი მღვდელმოწამე აბრაამის ხსენების დღეა.