28 იანვარს მართლმადიდებელი ეკლესია ღირსი პავლე თებაიდელის ხსენების დღეს აღნიშნავს

ღირსი პავლე თებაიდელი. ფოტო: tatmitropolia

მართლმადიდებელი სამოციქულო ეკლესია 28 იანვარს მოიხსენებს ღირს მამა პავლე თებაიდელს — უდაბნოს დიდ მეუდაბნოესა და ქრისტიანული ბერ-მონაზვნობის მამად წოდებულ წმინდანს.

ღირსი პავლე ეგვიპტის ქალაქ თებაიდაში დაიბადა. ყმაწვილ ასაკში მშობლების გარდაცვალების შემდეგ, ნათესავის სიხარბისა და იმპერატორ დეკიუსის დროინდელი დევნულობის საფრთხის გამო, მან დატოვა ქალაქი და უდაბნოში განმარტოვდა. წმინდანი მთის ძირას მდებარე გამოქვაბულში დამკვიდრდა, სადაც 91 წელი გაატარა მარხვაში, დაუდუმებელ ლოცვასა და ასკეტურ ღვაწლში.

მისი ერთადერთი საკვები იყო ფინიკები და პური, რომელსაც ყვავი უზიდავდა, ხოლო სამოსლად პალმის ფოთლები ემსახურებოდა. წმინდანის აღსასრულის წინ, ღვთის განგებით, მისი ყოფა გაეცხადა ანტონი დიდს, რომელიც თავადაც უდაბნოში მოღვაწეობდა. მათი შეხვედრა წმიდა მამათა შორის ძმური სიყვარულისა და სულიერი სიმდაბლის უმაღლეს მაგალითად მიიჩნევა.

ღირსი პავლე ლოცვის დროს მუხლმოყრილი აღესრულა. ანტონი დიდი იხილა მისი სულის ზეცად ამაღლება ანგელოზთა და წმინდანთა დასთან ერთად. წმინდანის დაკრძალვაში, გადმოცემის თანახმად, ორი ლომიც მონაწილეობდა. ღირსი პავლე თებაიდელი 341 წელს, 113 წლის ასაკში გარდაიცვალა.

მართალია, წმინდანს სიცოცხლეში სავანე არ დაუარსებია, თუმცა მისი ღვაწლით შთაგონებულმა მიმდევრებმა მოგვიანებით უდაბნო მონასტრებით დაფარეს. ღირსი პავლე მართლმადიდებლური ბერ-მონაზვნობის მამად ითვლება.

XII საუკუნეში იმპერატორ მანუელის ბრძანებით წმინდანის უხრწნელი ნაწილები კონსტანტინეპოლში გადააბრძანეს, მოგვიანებით კი ვენეციასა და უნგრეთში. ღირსი პავლეს პატიოსანი თავის ნაწილი დღეს რომშია დაცული.

მართლმადიდებელ ჟურნალისტთა კავშირი წერდა, სიონის საპატრიარქო ტაძარში წმინდა ნინოს ჯვარი გამოაბრძანეს.